«Ազատությունների համար պայքարը սկսվեց հրապարակներից և վախճանվեց... ննջասենյակներում»․ Արմենուհի Վարդանյան

Լրագրող Արմենուհի Վարդանյանը ֆեյսբուքյան իր էջում գրում է. «Ազատությունների համար պայքարը սկսվեց հրապարակներից և վախճանվեց... ննջասենյակներում։
«Դեմոկրատ» երկիր Հայաստանում մարդիկ արթնանում են տեսախցիկների ստվերի տակ։ Գաղտնալսումները դարձել են իշխանության սիրած սերիալը՝ սեզոն առ սեզոն բացահայտելով ոչ թե հանցագործներին, այլ քաղաքացիների անկողինները։
Տներում տեղադրված տեսախցիկները, գաղտնալսումները, մարդկանց անձնական կյանքի մեջ սղոսկելը չեն պաշտպանում պետությունը՝ դրանք քանդում են նրա հիմքը։ Երբ իշխանությունը սկսում է մարդկանց վախեցնել տեսանյութերով ու ձայնագրություններով, դա այլեւս իշխանություն չէ՝ դա շանտաժի համակարգ է։
Կարիք կա՞ բացատրելու՝ ինչո՞ւ է դա ուղղակի սպառնալիք մեր պետությանը...
Երբ իշխանությունը սկսում է դիտել սեփական ժողովրդին ոչ թե որպես քաղաքացիների, այլ որպես կասկածյալների՝ այդ պահից պետությունը դառնում է հսկող մեքենա։
Իսկ ի՞նչ է լինում մարդու հետ. նա այլեւս չի վստահում, որ իր հեռախոսը միայն իրեն է ծառայում, որ իր տունը միայն իրենն է... նա սկսում է վախենալ։
Վախի վրա պետություն չի կառուցվում։
Վախի վրա կառուցվում են համակարգեր, որտեղ մարդը լռում է, իսկ լռությունը դառնում է իշխանության համար ամենաթողության աղբյուր։
Պետությունը կանգուն է, ուժեղ է ոչ թե ուժային կառույցներով, այլ քաղաքացու արժանապատվությամբ, նրա վստահությամբ, որ իշխանությունը ծառայում է իրեն, ոչ թե հետեւում, կոմպրոմատ հավաքում...»։