«Ադրբեջանը պատրաստ է իր տարածքով թույլատրել ռուսական ապրանքների մուտքը ՀՀ»․ Օվերչուկ

Բաքուն պատրաստ է թույլ տալ իր տարածքով ռուսական ապրանքները հասնեն Հայաստան։ Այս մասին Ռիա Նովոստիի հաղորդմամբ հայտարարել է ՌԴ փոխվարչապետ Ալեքսեյ Օվերչուկը։
«Երկու օր առաջ ադրբեջանական կողմը մեզ հաստատեց ադրբեջանական երկաթուղիներով ռուսական ապրանքները Ադրբեջանի տարածքով Հայաստան տեղափոխելու հնարավորությունը։ Այս առումով մենք նույնպես շատ հետաքրքիր առաջընթաց ենք գրանցել։ Ներկայումս «Ռուսական երկաթուղիները» տարածաշրջանի իր գործընկերների հետ միասին քննարկում են այդ բեռնափոխադրումների կազմակերպման հարցերը։ Միաժամանակ, մենք համապատասխան հանձնարարականներ ենք տվել գյուղատնտեսության նախարարությանը՝ այս նոր լոգիստիկ երթուղին մշակելու համար», – ասել է Օվերչուկը։
Նա նաև ընդգծել է, որ Հյուսիս-Հարավ միջանցքի ադրբեջանական հատվածի կառուցման ուղղությամբ առաջընթացը հստակ տեսանելի է։