«Արտաքին միջամտությամբ փորձելու են Եկեղեցու դարավոր ինստիտուտը գաղափարապես ջարդել». Արեգ Սավգուլյան

Աշխատանքի և սոցիալական հարցերի նախարարի նախկին խորհրդական Արեգ Սավգուլյանը ֆեյսբուքյան գրառումը․ «1999 թվականի հոկտեմբերի 27-ին Գարեգին Բ-ն ընտրվեց Ամենայն հայոց կաթողիկոս, իսկ ԱԺ-ում գլխատվեց հայոց պետականությունը։ Այս երկու միմյանցից անկախ իրավիճակները հետագայում շաղկապելու էին միմյանց՝ փորձելով խնդիրը դիտարկել դավադրությունների տեսության հոլովույթում։ Բայց նույն օրվա համընկնումից բացի, այլ փաստարկ չկար։ Պատմությունը չենք կարող ջնջել և մեր ազգային հիշողության օրացույցում Հոկտեմբերի 27-ը ամրագրվեց՝ որպես ամոթալի էջ, որը ինչ-որ կերպ ստվերեց նաև նոր կաթողիկոսի գահակալումը։
Երեկ՝ հոկտեմբերի 27-ի նախօրյակին, Հովհաննավանքում կեղծ պատարագի ժամանակ ձևավորվեց մի նոր աղանդ, որը խնդիր ունի այս անգամ գլխատելու Հայ առաքելական սուրբ եկեղեցին։ Գարեգին Բ կաթողիկոսը՝ անկախ հանրային տարաբնույթ ընկալումներից, այն ինստիտուտն է, որի տապալումից հետո մեր Առաքելական եկեղեցին նույնը չի լինելու։ Բնականաբար, արտաքին միջամտությամբ փորձելու են Եկեղեցու դարավոր ինստիտուտը գաղափարապես ջարդել ու ավերել՝ հարմարեցնելով մի դրածո միջակության չափսերին, ինչպես վարվեցին ՀՀ աշխարհիկ իշխանության հետ։
Հ.Գ. Երեկ նոր աղանդի առաջնորդ Նիկոլը հայտարարեց, որ այս պատարագով սկսվում է Եկեղեցու «ազատագրման», այսինքն՝ կործանման մեկնարկը»։