«Էս ի՞նչ հեքիաթ է․ իմ ապրած կյանքն ինձ եք պատմո՞ւմ»․ Արարատ Միրզոյան

«Ասում եք՝ մեր ժողովրդավարությունն այնպիսինն է, որ ԵՄ-ն մեզ գրկաբաց ընդունելու է։ Մենք մի երկիր ենք, որտեղ մարդուն հայտարարության համար երկու տարով կալանավորում են»,- ԱԺ-ում ԱԳ նախարար Արարատ Միրզոյանի զեկույցի ժամանակ ասաց «Հայաստան» խմբակցության պատգամավոր Էլինար Վարդանյանը՝ ակնկալելով լսել Արարատ Միրզոյանի կարծիքը ՀՀ-ում ժողովրդավարության ներկայիս վիճակի վերաբերյալ։
Իր պատասխանում Միրզոյանը զուգահեռներ անցկացրեց՝ կրկին հիշելով նախկիններին․ «Տիկի՛ն Վարդանյան, իմ ընդդիմադիր եղած ժամանակ ընդդիմադիրներին սպանում էին։ Մարտի 1 է եղել, ընտրությունների արդյունքները տարիներ շարունակ կեղծվել են։ Մենք կարո՞ղ էինք մեզ թույլ տալ այնպիսի բառամթերք, ինչպես հիմա են օգտագործում։ Ձերոնց իշխանության ժամանակ կարո՞ղ էր լինել ընդդիմություն, որն այսքան մեդիառեսուրս ունենար։ Էս ի՞նչ հեքիաթ եք պատմում, իմ ապրած կյանքը եկել, ինձ եք պատմո՞ւմ»,- ասաց Միրզոյանը։
«Այո՛, նախկինում լավ չէր, սխալ էր, բայց դա նշանակում է, որ հիմա պետք է այսպես վարվե՞ք»,- արձագանքեց Վարդանյանը։