Ալ-Քաիդայի» զինյալներն, ամենայն հավանականությամբ, կգրավեն Մալին. The Wall Street Journal

«Ալ-Քաիդայի» զինյալները մոտ են Մալիի (Արևմտյան Աֆրիկայի երկիր) մայրաքաղաք Բամակոյի գրավմանը, հաղորդում է The Wall Street Journal-ը։

Եթե քաղաքը ընկնի, Մալին կարող է դառնալ աշխարհում առաջին երկիրը, որը կառավարվում է ԱՄՆ-ի կողմից ահաբեկչական ճանաչված խմբավորման կողմից, նշում է աղբյուրը։
WSJ-ն հաղորդում է, որ իրավիճակի սրման ֆոնին Վաշինգթոնը կոչ է արել ամերիկացի քաղաքացիներին անհապաղ լքել Մալին և սկսել է դեսպանատների աշխատակիցների մասնակի տարհանումը։

«Ջամաա Նուսրաթ ուլ-Իսլամ վա ալ-Մուսլիմին» (JNIM, որն իրեն անվանում է Մալիի «Ալ-Քաիդայի» պաշտոնական մասնաճյուղ) ծայրահեղականները արգելափակում են վառելիքի և սննդի մատակարարումները, ինչը հանգեցնում է պակասորդի և գնաճի։ Բամակոյում վառելիքի գները եռապատկվել են, իսկ դպրոցներն ու համալսարանները փակ են։

WSJ-ն հաղորդում է, որ փորձագետները գնահատում են, որ ջիհադիստները «հյուծման պատերազմ» են մղում՝ ձգտելով կրկնել «Թալիբանի» ռազմավարությունը Աֆղանստանում՝ խաթարելով կառավարությունը ներսից, ստիպելով նրան հանձնվել։

Հեղաշրջման միջոցով իշխանության գալուց հետո Մալիի խունտան վտարեց ֆրանսիական զինվորականներին և վարձկաններ բերեց ռուսական մասնավոր ռազմական Wagner ընկերությունից: Սակայն, չնայած արտաքին աջակցությանը, երկրում իրավիճակը վատթարացավ: Մասնագետները չեն բացառում, որ Բամակոյի անկումը կարող է շրջադարձային կետ լինել տարածաշրջանի համար, որտեղ «Ալ-Քաիդան» և «Իսլամական պետությունը» ակտիվ ապստամբություններ են կազմակերպում Նիգերում, Բուրկինա Ֆասոյում և Սահելի այլ երկրներում: