«Առանց ՀՀԿ-ի չեն կարողանալու Նիկոլ Փաշինյանին հեռացնել»․ Հայկ Մամիջանյան

Եթե Նիկոլ Փաշինյանը մնաց իշխանության, Հայաստանը կկանգնի գոյաբանական վտանգի առաջ։ 168-ի եթերում ասել է ԱԺ «Պատիվ ունեմ» խմբակցության ղեկավար Հայկ Մամիջանյանը՝ հավելելով, որ հենց այդ վտանգը չեզոքացնելու համար է ՀՀԿ-ն ներքաղաքական օրակարգի հարց է դարձրել իմփիչմենթը։
Դիտարկմանը, թե գործընթացը տեղից չի շարժվում, Մամիջանյանը արձագանքել է․ «Մենք հունիսի 7-ին առաջադրեցինք քաղբանտարկյալ դարձած Դավիթ Համբարձումյանի թեկնածությունը, ունեինք ընդամենը 6 ստորագրություն, այս պահին ունենք 34-ը, ինչպե՞ս է կանգնած տեղում։ Հիմա այդ աշխատանքը տարվում է՝ անկախ նրանից, որ ՔՊ-ականները հայտարարում են, թե չեն ստորագրելու։ Հայաստանում ռեպրեսիվ համակարգն այնպիսին է, որ այն ՔՊ-ականները, որոնք երեկոյան ստորագրելու են իմփիչմենթի համար, առավոտյան դարձյալ հայտարարած են լինելու, թե չեն ստորագրելու։ Մյուս կողմից, եթե այս գործընթացից ՔՊ-ականները չեն վախենում, այդ դեպքում վարչապետի թեկնածու Դավիթ Համբարձումյանին ինչո՞ւ կալանավորեցին»,- ասել է Մամիջանյանը՝ նշելով, որ ոչ մի քաղաքական ուժ Նիկոլ Փաշինյանին միայնակ չի կարողանալու հեռացնել։ Հարցին՝ առանց ՀՀԿ-ի կարողանալո՞ւ են, Մամիջանյանը պատասխանել է. «Իհարկե ո՛չ։ Ով իմփիչմենթից ավելի արագ, գործուն ձև գիտի, թող հայտարարի, ՀՀԿ-ն կլծվի այդ աշխատանքի կատարմանը»։