«Տեսանյութի ձայնն ինչո՞ւ եք խլացրել»․ Հարություն Մկրտչյան

Վաղարշապատ խոշորացված համայնքում «Հանրապետություն» կուսակցության թեկնածու Հարություն Մկրտչյանը Ֆեյսբուքի իր էջում գրում է․ «Ոսկեհատը և Կտրիճ Ներսիսյանի ընտանեկան, ստվերային կառավարումը.
Խախտելով նախաքննության ընթացքում անմիջապես գործի քննությանը առնչվող նյութերի հրապարակման արգելքը՝ Կտրիճի, Ռոբերտ Քոչարյանի և Սերժ Սարգսյանի գրպանային փաստաբանները երեկ հրապարակել են մի տեսանյութ, որտեղ երևում է, թե ինչպես են 3 հոգի «զրուցում»՝ փորձելով ներկայացնել սա իբրև ապացույց, թե որևէ սադրանք, խուլիգանություն, քարոզարշավի խոչընդոտում չի եղել։
Տեսանյութը, որքան հասկացա, վերցված է Ներսիսյանների տան դիմաց տեղադրված տեսանկարահանող սարքից։
Բանալի բառը՝ երևում է...
Բա ձայնը ինչո՞ւ եք խլացրել, որ սեռական բնույթի հայհոյանքները, անվանարկումները, վիրավորանքները, սադրանքի իսկությունը չլսվի՞...
Հանրությանը ուզում եմ տեղեկացնել, որ մինչև 16:10 իմ ժամանելը Ոսկեհատ բնակավայր, մեր նախընտրական շտաբից ժամը 11:00-ից համայնքի կենտրոնական հատված են տանում ու տեղադրում իրազեկող, քարոզչական վրան, որպեսզի տեղյակ պահվի, որ 16:00 լինելու է հանդիպում թեկնածուի հետ։
Տեսանյութում իմ ավագանու ցուցակի հինգերորդ համարն է ու ամենատարեցը մեր թիմում, ով մինչև իմ գնալը արդեն այնտեղ է եղել իրազեկման ևս մի քանի թիմակցի հետ։
Անցնելիս Ներսիսյանների տան մոտով՝ կրտսեր Ներսիսյանը վերջինիս հետ սկսել է խոսել սեռական բնույթի հայհոյանքներով, վիրավորանքներով համեմված (որովհետև նկատել է մեր քարոզչական թերթիկը իր մոտ), ապա գումարվել է ավագ Ներսիսյանի կռվի տոնով նույնանման խոսույթը ու հորդորը, որ հեռանան:
Մինչև մեր գալը հասցրել էին սադրել նաև թիմակից աղջիկներից մեկին, ինչպես նաև «ցրել» բնակիչների կուտակումները և կուտակվել արդեն սեփական «ռեսուրսներով»։
Այս ամենն ասում եմ, որպեսզի իրենց փաստաբանիկներ հորջորջող գաճաճները իրենց ճենճոտ լապշան չփորձեն կախ տալ մեր հանրության ականջներից, մնացածը թող պարզեն նախաքննությունը և իրավապահները»։