«Կոչ ենք անում իշխանություններին՝ դադարեցնել ՀԱԵ ներքին կյանքին միջամտելու բոլոր դրսևորումները». Երուսաղեմի հայոց պատրիարք

Երուսաղէմի Սրբոց Յակոբեանց Միաբանութիւնը ֆեյսբուքի իր էջում հանդես է եկել հայտարարությամբ․ «ԶՕՐԱԿՑՈՒԹԻՒՆ ՄԱՅՐ ԱԹՈՌ ՍՈՒՐԲ ԷՋՄԻԱԾՆԻՆ
Խոր ցաւով և մտահոգութեամբ կը հետևինք վերջին ամիսներուն Հայց. Առաքելական Սուրբ Եկեղեցւոյ թեմակալ առաջնորդներու, բարձրաստիճան հոգևորականներու և մասնաւորապէս Հովհաննավանքի շուրջ ծաւալուող խիստ անհանգստացուցիչ և ցաւալի դէպքերուն: Կարգալոյծ հոգևորականի կողմէ՝ պետական իշխանութեան բացայայտ հովանաւորութեամբ իրականացուող գործողութիւնները ոչ միայն անօրինական են և հակառակ եկեղեցական կանոնադրութեան, այլև կը խաթարեն Հայց. Առաքելական Սուրբ Եկեղեցւոյ վարկն ու հեղինակութիւնը, կը վիրաւորեն Հայ ժողովուրդի հոգևոր զգացումները և կը վտանգեն մեր դարաւոր ինքնութիւնն ու հաւատքը:
Այս դժուարին ժամանակներուն, երբ մեր ժողովուրդը կը դիմագրաւէ ներքին և արտաքին փորձութիւններ, Հայց. Առաքելական Սուրբ Եկեղեցին կը մնայ մեր հոգևոր յենարանը և բարոյական առագաստը, որ կը միացնէ մեր ժողովուրդը հաւատքի և յոյսի շուրջ: Հետևաբար, Եկեղեցւոյ դէմ ուղղուած իւրաքանչիւր ոտնձգութիւն, ոտնձգութիւն է մեր պատմական յիշողութեան և հոգևոր արժէքներուն դէմ: Անթոյլատրելի է պետական այրերու միջամտութիւնը Եկեղեցւոյ ներքին կեանքին, առաւել ևս՝ կարգալոյծ անձերու սատարումը՝ Հովհանավանքը զաւթելու և անվաւեր «պատարագներ» մատուցելով օրինական ծէսերը խաթարել փորձելու ընթացքին:
Յանուն Սրբոց Յակոբեանց Զինուորեալ Միաբանութեան խստօրէն կը դատապարտենք այս անօրինական և անպատուաբեր քայլերը և կոչ կ’ընենք պետական իշխանութեան՝ դադրեցնել Հայց. Առաքելական Եկեղեցւոյ ներքին գործերուն միջամտելու բոլոր դրսևորումները, վերականգնել արդարութիւնը և օրինականութիւնը, և ապահովել Եկեղեցւոյ օծեալ սպասաւորներու անվտանգ և խաղաղ գործունէութիւնը:
Մեր անկեղծ զօրակցութիւնը կը յայտնենք Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսին և հոգևորականաց դասուն, որոնք անձնուէր կերպով և անսասան հաւատքով կը շարունակեն իրենց հովուական և հովուապետական առաքելութիւնը՝ չընկրկելով քաղաքական կամ վարչական ճնշումներու դէմ: Անոնց հաւատքը, համբերութիւնը և անշահախնդիր ծառայութիւնը այսօր ևս մեր ազգի անմահ ոգիին կենդանի վկայութիւն են:
Աղօթքով կը խնդրենք, որ Տէրը զօրացնէ Հայց. Առաքելական մեր Սուրբ Եկեղեցին, առողջ և երկար օրեր պարգևէ Ամենայն Հայոց Հայրապետին, լուսաւորէ մեր իշխանութիւնները արդարութեան և ճշմարտութեան ճանապարհին, և պահէ մեր ժողովուրդը հաւատքի, խաղաղութեան ու համերաշխութեան մէջ:
Նուրհան Արք. Մանուկեան
Հայ Պատրիարք Երուսաղէմի»։