«Ադրբեջանի հռետորաբանությունը կտրուկ իջել է, դա տեսանելի է նաև սահմանին»․ Սուրեն Պապիկյան

«Սովորություն չունեմ մեկնաբանել մի բան, որն ինքս չեմ լսել կամ կարդացել, ինքս կկարդամ այն ու, ըստ անհրաժեշտության, մյուս առիթի ժամանակ դրան կպատասխանեմ»,- լրագրողների հետ զրույցում ասաց ՀՀ պաշտպանության նախարար Սուրեն Պապիկյանը՝ չմեկնաբանելով Ադրբեջանի նախագահի Իլհամ Ալիևի այսօրվա հայտարարությունը։

«Բայց այն, որ Ադրբեջանի հռետորաբանությունն օգոսոսի 8-ից հետո կտրուկ իջել է, փոխվել է ու դա տեսանելի է նաև սահմանին, ինչը ես կարող եմ ասել որպես պաշտպանության նախարար, դա փաստ է, ու երբ մենք խոսում են խաղաղության մասին, ամենևին հորինված չէ, դա իրականություն է»,- նշեց նախարարը։

«Ալիևը ինչո՞ւ է մերժում Հայաստան այցը, որը նշան կլիներ, որ պատրաստ է խաղաղության»․ լրագրողի այս հարցին պաշտպանության նախարարը պատասխանեց․ «Ուզում եք Ադրբեջանի նախագահի փոխարեն ե՞ս պատասխանեմ հարցին, չունեմ այդ հարցի պատասխանը»։