«Եթե «Շողակաթ»-ը կատարեր իր պարտավորությունները, չէր զրկվի հեռարձակման հնարավորությունից». Տիգրան Հակոբյան

«2020 թվականի նոր օրենքի համաձայն, «Շողակաթ»-ը ոչ թե հոգևոր-մշակութային էր, այլ կրթական-մշակութային: Հոգևոր-կրոնական հաղորդումներ կրթական-մշակութային ալիքում չպետք է լինեն, որովհետև կրթությունը և մշակույթը կրոնի հետ որևէ կապ չպետք է ունենան: Բայց մենք դրա վրա ուշադրություն չդարձրեցինք, չձևափոխվեց նաև «Շողակաթ» հեռուստաընկերությունը»,- ճեպազրույցի ժամանակ ասել է ՀՌՀ նախագահ Տիգրան Հակոբյանը:

Նա նշել է, որ եթե «Շողոկաթ»-ը կատարեր իր առաքելությունը և օրենսդրական պարտավորությունները, չէր զրկվի հեռարձակման հնարավորությունից: «Ես կարծում եմ, որ չի կարելի նույնիսկ հոգևոր կոչվող ալիքում և՛ Աստծո առաքելությունից խոսել, և՛ ցույց տալ քաղաքական բովանդակություն: Սա երկար չէր կարող տևել: Դա հասարակությունն էլ նկատեց, և գնալով իջավ հեռուստաալիքի ռեյտինգը»,- հավելել է նա: