Հետաքրքիր փաստեր` Սերգեյ Խաչատրյանին փոխանցված` Ստրադիվարիուսի ջութակի մասին

Ստրադիվարիուսի՝ 16 միլիոն դոլար արժողությամբ ջութակը 10 տարով հանձնվել է հայ ջութակահար Սերգեյ Խաչատրյանին։
Գործիքը պատրաստվել է 1723 թվականին և կոչվում է «Կիզևեթթեր»՝ իր նախկին տերերից մեկի անունով։ Ջութակը գնվել է բարեգործական ընկերության կողմից աճուրդում և ժամանակավոր օգտագործման է տրվել երաժշտին։ Խաչատրյանը առաջին անգամ նվագել է այս ջութակով Բրյուսելի Գեղեցիկ արվեստների պալատի բեմում։
Հետաքրքիր է, որ ջութակի նախկին տերերից մեկը մի անգամ այն պատահաբար մոռացել էր Նյու Յորքի տաքսիներից մեկում: Բարեբախտաբար, գործիքը գտնվել էր հաջորդ օրը:
Անտոնիո Ստրադիվարիուսն իտալացի վարպետ է, բոլոր ժամանակների ամենահայտնի ջութակ պատրաստողներից մեկը։ Նրա պատրաստած գործիքները կոչվում են Ստրադիվարիուս (Stradivarius): Ընդհանուր առմամբ պահպանվել է մոտ 500–600 Ստրադիվարիուսի իրական ջութակ, ինչպես նաև մի քանի տասնյակ թավջութակ և ալտ։ Ստրադիվարիուսի ջութակները հայտնի են իրենց անհավանական հնչողությամբ՝ ջերմ, խորը և հստակ տոնով, որն առ այսօր ոչ ոք ամբողջությամբ չի կարողացել կրկնել։ Շատ երաժիշտներ և գիտնականներ փորձել են բացատրել դրանց գաղտնիքը՝ նյութերից մինչև լաքի բաղադրություն, բայց հստակ պատասխան դեռ չկա։ Այսօր նման գործիքների արժեքը հասնում է մի քանի միլիոն դոլարի, իսկ որոշ նմուշներ գերազանցում են 20 միլիոնը։ Հիմնականում դրանք պատկանում են բարեգործական հիմնադրամների կամ մասնավոր հավաքորդների, որոնք ժամանակավորապես փոխանցում են դրանք աշխարհահռչակ երաժիշտներին։