«ՔՊ-ի ապօրինությունները մնում են անարձագանք»․ Լիա Սարգսյան

Լրագրող Լիա Սարգսյանը ֆեյսբուքյան էջում տեսանյութ է հրապարակել՝ կից գրառմամբ․ «Իրավապահներն «էշի ականջին քնած են»․Վաղարշապատում ՔՊ-ի ապօրինությունները մնում են առանց արձագանքի
Վաղարշապատում իշխող ուժի ապօրինությունները մնում են առանց արձագանքի։ Համայնքի ղեկավարի ընտրություններից շուրջ տասը օր առաջ, քարոզարշավի ակտիվ փուլում, ՔՊ-ականների «բեսպրեդելի»֊ի սահմաններն ավելի է ընդլայնվել․ ասֆալտ փռել, տանիքներ փոխել, փողոցներ վերանորոգել, ոչ սահմանված վայրերում պաստառներ փակցնել, եւ այլն։
«Իշխանություն» լրատվականը Զվարթնոց թաղամասի տարբեր փողոցներում արձանագրել է, որ վերջին օրերին տարբեր փողոցներում աղացած ասֆալտ է փռվել։ Մենք նաեւ արձանագրել ենք, որ Շահումյան գյուղում ընթանում են մեծածավալ շինարարական աշխատանքներ։ Սա եւս ընտրողների վրա անուղղակի ազդեցության ձև է, ինչը արգելվում է ընտրական օրենսգրքով։ Այս գործողությունները կարող են դիտարկվել որպես ընտրակաշառք՝ եթե արված են ընտրողների քաղաքական նախասիրությունների վրա ազդելու նպատակով։
Ըստ ՀՀ քրեական օրենսգրքի 163-րդ հոդվածի՝ «ընտրակաշառք տալը» համարվում է հանցագործություն, եթե նյութական օգուտը տրամադրվում է՝ ընտրողի քվեն ստանալու համար։Բացի այդ, Արգիշտի Մեխակյանի նախընտրական պաստառները փակցվել են իշխանությունների հետ սերտ կապերի մեջ գտնվող Հայրիկ Սարգսյանի «Մաստեր մեդ» հիվանդանոցի պատերին։
Թեև իշխանական թեկնածու Արգիշտի Մեխակյանի պաստառները փակցված են ոչ թե պետական, այլ մասնավոր բժշկական հաստատությունների պատերին, սակայն փաստը դրանով չի անլրջանում։ Նշված հիվանդանոցը, ըստ «Իշխանություն» լրատվականի աղբյուրների, սերտորեն համագործակցում է Վաղարշապատի պետական հիվանդանոցի հետ․ օրինակ՝ հիվանդների ՀՏ հետազոտությունները իրականացվում են հենց այդ մասնավոր կլինիկայում։ Այսինքն՝ բուժհաստատությունը կատարում է պետական պատվերներ և օգտվում է հանրային ռեսուրսներից։
Բացի այդ, այս բժշկական կենտրոնում աշխատում է նախարարներից մեկի կինը, ինչը հավելյալ քաղաքական ենթատեքստ է տալիս իշխանական թեկնածուի պաստառների ներկայությանը։
Հիշեցնենք, որ քարոզարշավի հենց առաջին օրվանից իշխող ուժի գործողությունների վերաբերյալ «Իշխանություն» լրատվականը հրապարակել է մի շարք փաստեր, որոնք արդեն դարձել են իրավական գործընթացի հիմք։
«Իրազեկ քաղաքացիների միավորում» ՀԿ-ն երկու դիմում է ներկայացրել ՀՀ գլխավոր դատախազություն, որը դրանք փոխանցել է Հակակոռուպցիոն կոմիտե՝ ուսումնասիրության համար։