Բուդապեշտը կլինի ՌԴ-ի և ԱՄՆ-ի նախագահների հանդիպման նախընտրելի վայրը

Բուդապեշտը կլինի ՌԴ-ի և ԱՄՆ-ի նախագահներ Վլադիմիր Պուտինի և Դոնալդ Թրամփի հանդիպման նախընտրելի վայրը, եթե Վաշինգթոնը վերսկսի իր նախաձեռնությունը և ցուցաբերի գագաթնաժողովին նախապատրաստվելու պատրաստակամություն: Այս մասին հայտարարել է Ռուսաստանի արտաքին գործերի նախարար Սերգեյ Լավրովը ռուսական լրատվամիջոցներին տված հարցազրույցում:

Նա նաև հերքել է այն տեղեկությունները, որ Բուդապեշտի բանակցությունները խափանվել են Ռուսաստանի նախաձեռնությամբ՝ ընդգծելով, որ Մոսկվան սպասում էր Վաշինգթոնի կողմից գործողությունների ձեռնարկմանը, «որոնք այդպես էլ տեղի չունեցան»:

Լավրովը նաև նշել է, որ Ռուսաստանն առաջարկում է մեկ տարով երկարաձգել ռազմավարական սպառազինությունների կրճատման պայմանագրի (ՍՍՏՊ) սահմանափակումները՝ «հիշելով մեծ տերությունների պատասխանատվությունը միջուկային պատերազմը կանխելու հարցում»: Այնուամենայնիվ, նախարարը զգուշացրել է, որ եթե միջուկային տերություններից մեկը միջուկային զենքի փորձարկում անցկացնի, Ռուսաստանը նույն կերպ կպատասխանի: Նրա խոսքով, ՍՍՏՊ սահմանափակումների մեկ տարով երկարաձգման մասին կարող է հայտարարվել ցանկացած պահի՝ մինչև պայմանագրի ժամկետի լրանալը՝ փետրվարի 5-ին:

Արտգործնախարարը նաև նշել է Մոսկվայի պատրաստակամությունը՝ Վաշինգթոնի հետ քննարկել ամերիկյան կողմի մտահոգությունները Ռուսաստանի «կասկածելի ստորգետնյա գործունեության» վերաբերյալ: