Ադելն առաջին անգամ կնկարահանվի ֆիլմում

Variety-ն հաղորդում է, որ երգչուհի Ադելը կնկարահանվի Թոմ Ֆորդի «Լաց դեպի երկինք» («Cry to Heaven») ֆիլմում, որը հիմնված է Աննա Ռայսի 1982 թվականի համանուն վեպի վրա։

Գրքի գործողությունները տեղի են ունենում 18-րդ դարի Իտալիայում և վենետիկցի ազնվականի և օպերային երգչի մասին են, որոնց կյանքերն անսպասելիորեն հատվում են։ Թոմ Ֆորդը կգրի սցենարը և կդառնա պրոդյուսերը:

Ադելի ճշգրիտ դերը դեռևս անհայտ է, բայց ենթադրվում է, որ նա կլինի գլխավոր դերակատար։ Նրա խաղընկերների թվում կլինեն Նիկոլաս Հոլթը, Աարոն Թեյլոր-Ջոնսոնը, Քիարան Հայնդսը, Ջորջ Մաքքեյը, Մարկ Ստրոնգը, Հանթեր Շաֆերը և ուրիշներ։ Ֆիլմը գտնվում է նախնական արտադրության փուլում Լոնդոնում և Հռոմում։ Արտադրությունը նախատեսվում է սկսել հունվարին։ Պրեմիերայի ենթադրյալ ամսաթիվը 2026 թվականի աշունն է։

Թոմ Ֆորդը Gucci-ի և Yves Saint Laurent-ի նախկին ստեղծագործական տնօրենն է։ Նրա առաջին ռեժիսորական աշխատանքը 2009 թվականին նկարահանված «Միայնակ մարդ» ֆիլմն էր։ 2016 թվականին դիզայները թողարկեց «Գիշերային կենդանիներ» ֆիլմը, որը Վենետիկի կինոփառատոնում արժանացավ գլխավոր մրցանակի։

Ադելը իր երգչուհու կարիերան սկսել է 2006 թվականին։ Այդ ժամանակից ի վեր նա թողարկել է չորս ալբոմ և արժանացել 16 Գրեմմի մրցանակի, մեկ Օսկարի, մեկ Էմմիի և մեկ Ոսկե Գլոբուսի։