«Էջմիածնեցի կռված տղերքի կեսի վրա քրեական գործեր են բացված»․ Վահրամ Մարտիրոսյան

Գործարար Վահրամ Մարտիրոսյանի ֆեյսբուքյան գրառումը. «Էջմիածնեցի կռված տղերքի կեսի վրա քրեական գործեր են բացված՝ զուտ այն պատճառով, որ նրանք տարբեր առիթներով իրենց անհամաձայնությունն են հայտնել հայրենիքում տեղի ունեցողին։
Հավաքական կռված դասը ասում է, որ սրանք դավաճան են։ Եվ սա զուտ քաղաքական մեղադրանք չէ։ Մարտի դաշտում եղածները սեփական աչքերով են տեսել, թե ինչպես են իրենց մեջքից խփում, ինչպես է գլխավոր չհրամանատարը դադարեցնում համալրումը, ինչպես է փլուզվում բանակի ուղղահայացը։
Ում համար կենդանի մնացած հերոսի խոսքը հեղինակություն չի, ինքը զոհվածի կենացը խմելու ո՜չ իրավունքը ունի, ո՜չ պատասխանը։ Ամեն երեսպաշտ կեղծավորը չպետք է զոհվածի կենաց խմի։
Էջմիածնի ընտրությունները ոչ թե կողմի, այլ տեսակի ընտրության հարց է։
Մեր տեսակի համար այբուբենը պարզապես տառեր չեն, այլ հայկականության խորհրդանիշ։ Մասիսը պարզապես սար չէ, այլ հայկականության խորհրդանիշ։ Տիգրանը պարզապես թագավոր չէ, այլ հայկականության խորհրդանիշ։ Եվ այսպես՝ Հայկից սկսած, մեր մեծերով ու մեր ստեղծածով ձևավորվում է մեր հայ լինելը։
Հիմա դու ո՞ր տեսակից ես՝ նա, ով համարում է Մասիսը պարզապես սար, թե նրա, ով համարում է այն հայկականության խորհրդանիշ։ Ու դու քեզ Հայ ես համարում, թե՞ «իրական» հայաստանցի»։