«Փաշինյանի հաղթանակը գալիք ընտրություններում մեր երկու հարևանների ախորժակն ավելի է բացելու»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Շատերը զարմացած են՝ 30 տարի խաղաղության մասին էիք խոսում, ի՞նչ է ձեր ուզածը, չէ՞ որ այս իշխանությունները խաղաղություն են բերում, ինչո՞ւ չեք աջակցում նրանց:
Նույնը Հայաստան-Թուրքիա հարաբերությունների մասին է:
Անձամբ համարել եմ, որ Հայաստան-Թուրքիա հարաբերությունների հաստատումը մեր երկրի համար ունի ճակատագրական նշանակություն: Այսօր էլ եմ այդպես մտածում:
Ժամանակին շատ հետևողական եմ քննադատել Սերժ Սարգսյանի ֆուտբոլային դիվանագիտությունը, քանի որ համարել եմ, որ նա այս հարցում մոլորյալ է. եթե ուզում ես Թուրքիա-Հայաստան բնականոն հարաբերություններ, ապա պետք էր Արցախի հարցում գնալ փոխզիջումների, մինչդեռ մենք 180 աստիճանով սխալ կողմից էինք մոտենում:
Ու հիմա հարց. իսկ ինչո՞ւ Թուրքիան չի բացում սահմանը և հարաբերություններ չի հաստատում, երբ Ադրբեջանը ստացել է ավելին:
Պատճառը շատ պարզ է. քանի դեռ շարունակում է ստանալ, անիմաստ է Հայաստանի հետ խոսել: Հայաստանն այսօր ոչինչ չունի տալու, բացի իր խորհրդանիշներից, ինքնության կարևոր սյուներից հրաժարվելն է և նոր հիշողության քաղաքականության կերտումը:
Շատ խոցելի վիճակում է նաև երկխոսության և խաղաղության ջատագով քաղաքացիական հասարակության վիճակը: Ինչի շուրջ երկխոսես, երբ իշխանությունները համաձայն են ամեն ինչի կամ գրեթե ամեն ինչի հետ:
Թուրքերը մեզանից ստանում են՝ ինչ ուզում են:
Ադրբեջանը մեզանից ստանում է՝ ինչ ուզում է, հետևաբար՝ նոր պատերազմի կամ ներխուժումների կարիք չունի:
Այդուհանդերձ, չպետք է արժեզրկել Վաշինգթոնում ձեռք բերվածն ու Հայաստան-Թուրքիա այսօրվա վիճակը, որովհետև դրանից էլ կարող ենք զրկվել:
Իսկ ամենավտանգավորը կարող է լինել գալիք խորհրդարանական ընտրություններում:
Ադրբեջանի և Թուրքիայի համար շատ հարմարավետ է աշխատել վարչապետ Փաշինյանի հետ:
Փաշինյանի հաղթանակը գալիք ընտրություններում մեր երկու հարևանների ախորժակը ավելի է բացելու:
Փաշինյանի պարտությունը առիթ է տալու նրանց ասելու, որ Հայաստանում իշխանության են վերադարձել ռևանշիստները:
Երրորդ ուժ չի ձևավորվում»: