Սաուդյան Արաբիան Սիրիա է հասցրել նավթի առաջին բեռը

Սաուդյան Արաբիան Սիրիա է հասցրել նավթի առաջին բեռը, որը տրամադրվել է Արաբական Հանրապետության էներգետիկ ոլորտին աջակցելու համար նախապես համաձայնեցված օգնության փաթեթի շրջանակներում, հաղորդում է Al Arabiya-ն։

Նոյեմբերի 16-ին Բանիյասի նավահանգիստ է ժամանել 650,000 բարել նավթ տեղափոխող լցանավ։ Ըստ որոշ տեղեկությունների՝ այս բեռն առաջինն էր 1,65 միլիոն բարել աջակցության շրջանակներում։

Սեպտեմբերի 11-ին Սաուդյան Արաբիայի զարգացման հիմնադրամը և Սիրիայի էներգետիկայի նախարարությունը համաձայնագիր են ստորագրել՝ սիրիական նավթավերամշակման գործարանների արդյունավետության և կայունության բարելավմանն ուղղված աջակցություն տրամադրելու վերաբերյալ։ Հուլիսի վերջին Ռիադը և Դամասկոսն էներգետիկ համագործակցության վերաբերյալ փոխըմբռնման հուշագիր են ստորագրել, որը նախատեսում է երկու երկրների միջև ընդլայնված համագործակցություն նավթի և գազի, նավթաքիմիական, էլեկտրաէներգետիկ և վերականգնվող էներգիայի ոլորտներում։