Վարպետաց վարպետների հանդիպումը Մարտիրոս Սարյանի տուն-թանգարանում

1031

Երկուշաբթի, 17 նոյեմբերի, 2025 թ., 23:06

Ավետիք Իսահակյանի 150-ամյակին նվիրված միջոցառումների շրջանակում Մարտիրոս Սարյանի տուն-թանգարանում տեղի ունեցավ «Վարպետաց վարպետների հանդիպումը» խորագիրը կրող ցուցահանդեսի բացումը, որը նվիրված է երկու մեծերի՝ Ավետիք Իսահակյանի և Մարտիրոս Սարյանի ստեղծագործություններին ու կտավներին, նաև՝ վարպետների ջերմ ընկերությանը, որը ևս մեկ անգամ ընդգծվում է այս միջոցառման շնորհիվ։

Ցուցահանդեսում ներկայացված են Մարտիրոս Սարյանի տուն-թանգարանում, Հայաստանի ազգային պատկերասրահում, Եղիշե Չարենցի անվան գրականության և արվեստի թանգարանում պահվող թանգարանային առարկաներ՝ գեղանկարներ, գրաֆիկա:

Առաջին անգամ ցուցադրվում են Սարյանների և Իսահակյանների ընտանեկան հավաքածուներում պահվող բացառիկ ստեղծագործություններ, լուսանկարներ, գրքեր, Ավետիք Իսահակյանի նամակներն ուղղված Մարտիրոս Սարյանին, ինչպես նաև Սարյանի նկարչական ալբոմում՝ Իսահակյանի ձեռքով գրված «Ռավեննայում» բանաստեղծության ինքնագիրը: