«Ինչպե՞ս հաղթեց Փաշինյանը Վաղարշապատի ընտրությունները». Էդմոն Մարուքյան

«Լուսավոր Հայաստան» կուսակցության նախագահ Էդմոն Մարուքյանի ֆեյսբուքյան գրառումը․ «Ինչպե՞ս հաղթեց Փաշինյանը Վաղարշապատի ընտրությունները։

*Փոխվեց ընտրական քարտեզը, հետո՝ որոշված քարտեզին համապատասխան, թեկնածու ընտրվեց։ Վաղարշապատ համայնքը խոշորացավ, նրան միացավ Խոյ համայնքը, որի համայնքապետն է եղել 2021 թվականից Արգիշտի Մեխակյանը։ Կարևոր արձանագրում՝ Խոյ համայնքի բոլոր 16 գյուղերի գյուղապետերին վերջինս է նշանակել։
Քաղաքագիտական լեզվով ասած՝ կիրառվել է ջերիմանդերինգ (gerrymandering). ընտրատարածքների սահմանները ձևավորվել են կուսակցական շահերից ելնելով։ Այս ընտրական մանիպուլիացիոն մեթոդը ԱՄՆ-ում գործածվել է 19-րդ դարից։

*Հնարավորինս նվազեցվեց ու հանվեց Քաղաքացիական պայմանագրի գրգռող ֆակտորը, անգամ կուսակցության անվանումը չկար Մեխակյանի պաստառներին։ Մեսիջը հետևյալն էր․ «Դուք ընտրում եք ոչ թե ՔՊ, այլ 7 համարը, ձայն եք տալիս Խոյի երկար տարիների համայնքապետ Արգիշտի Մեխակյանին՝ ձեր հող ու ջրի մարդուն»։

*Ընտրաշավին չէր մասնակցում Փաշինյանը, և չկային նրա հավատ չներշնչող ու ընտրազանգվածին վանող ելույթները։

Իշխանությունը դասեր քաղեց Գյումրիի ընտրություններից, ճկունություն ցուցաբերեց ու հաղթեց Վաղարշապատում։
Ընդդիմությունը իրավունք չունի կրկնելու նույն սխալները 2026-ի խորհրդարանական ընտրություններին։
Հետևություններ է պետք անել»։