«Միգուցե զենք-զինամթերք չենք արտադրում այն պատճառով, որ ովքեր Երևանը անվանում են «Իրևան», դեմ են դրան»․ Բենիամին Մաթևոսյան

Քաղաքագետ Բենիամին Մաթևոսյանը ֆեյսբուքյան իր էջում տեսանյութ է հրապարակել՝ կից գրառմամբ. «400 նյութ, որտեղ Երևանը «Իրևան» է: Հայաստանին անհրաժեշտ է ժողովրդավարությո՞ւն։ Իհարկե, անհրաժեշտ է։ Հայաստանին անհրաժեշտ են հարաբերություններ Ադրբեջանի և Թուրքիայի հե՞տ։ Իհարկե, անհրաժեշտ են։ Սակայն հարաբերությունների ի՞նչ մոդել են պատկերացնում Ադրբեջանում և Թուրքիայում Հայաստանի հետ։
Այս հարցին պատասխանելու համար, հարգելի՛ ընկերներ, առաջարկում եմ մտնել ադրբեջանական պետական «Ազերթաջ» (Azertag) լրատվական գործակալության կայք և որոնման բաժնում մուտքագրել «Իրևան» (Иреван/Irevan) բառը։ Դուք կտեսնեք, որ ադրբեջանական պետական լրատվամիջոցը պատրաստել է ավելի քան 400 նյութ, որտեղ Երևանը անվանվում է «Իրևան»։
Հիշում եք, չէ՞, թե ինչպես էին Արարատը հանում սահմանային դրոշմակնիքներից և ասում. «Իսկ պատկերացրեք, եթե մեր հարևանները նույն կերպ իրենց անվանումները տային Հայաստանում առկա որևէ օբյեկտի, դա մեր դուրը կգա՞ր, թե՞ ոչ»։
Տեսնո՞ւմ եք, նրանք մեր մայրաքաղաքն անվանում են «Իրևան»։ Սա պետական քաղաքականության բացահայտ դրսևորում է։
Հարգելի՛ ընկերներ, բոլոր ազգերի պատմության մեջ էլ լինում են պարտություններ։ Խնդիրը նրանում է, թե դու դրանից հետո վերականգնվո՞ւմ ես, թե՞ ոչ։ Տեսե՛ք՝ Իրանում տեղի ունեցավ 12-օրյա պատերազմը։ Պատերազմից հետո նրանք ակտիվորեն զենք-զինամթերք են գնում Չինաստանից և Ռուսաստանից, չհաշված այն, որ հենց Իրանն էլ է ահռելի քանակությամբ զենք-զինամթերք արտադրում։ Իրանական «Շահեդները» ռուսներին օգնում են Ուկրաինայում լուրջ ռազմավարական խնդիրներ լուծել։ Մենք ինչո՞ւ չենք դիմում նրանց օգնությանը։ Ինչո՞ւ չենք տեղայնացնում ռուսների փորձը նաև այստեղ՝ մասնավորապես ռազմական արդյունաբերության առումով։
Իսկ միգուցե այն պատճառո՞վ, որ նրանք, ովքեր Երևանը անվանում են «Իրևան», դեմ են դրան»: