«Առավել քան արդիական է դառնում հայ–իրանական երկաթուղու կառուցման գաղափարը». Արա Պողոսյան

Քաղաքագետ Արա Պողոսյանի ֆեյսբուքյան գրառումը. «Հայ-իրանական երկաթգծի կառուցման մասին դեռևս 2008 թ․ հոկտեմբերին հայտարարեց նախկին նախագահ Սերժ Սարգսյանը: Խորհրդարանում իր ելույթ–ուղերձով խոստացավ․ «Առաջիկա ամիսների ընթացքում Հայաստանը սկսում է նոր ատոմակայան կառուցել, առաջիկա տարիների ընթացքում սկսվելու է Իրան-Հայաստան երկաթուղու կառուցումը: Առաջիկա ամիսների ընթացքում Համահայկական բանկ ու ներդրումային հիմնադրամ է ստեղծվելու, որոնք մեծամասշտաբ ծրագրեր են ֆինանսավորելու: Հարցնում եք՝ կկարողանա՞նք, պատասխանում եմ, որ կկարողանանք: Հեշտությամբ կկարողանանք, եթե միասին գործենք»:
Ցավոք, ժամանակը ցույց տվեց, որ ո՛չ միայն ատոմակայան կառուցելը, այլև Հայաստանի համարա ռազմավարական նշանակության Իրան-Հայաստան երկաթուղու կառուցումը մնացին միայն խոստումներ։ Հայտնի է, որ միակ առարկայական քայլը եղել էր ԱՄԷ–ում գրանցված մի ինչ–որ ներդրումային կազմակերպության հետ պայմանավորվածությունը, որը նախագծի արժեքը գնահատում էր 3.5 մլրդ դոլար։ Հայաստանի տարածքում երկաթուղու ընդհանուր երկարությունը պետք է կազմեր 305 կմ։ Այն պիտի կունենար 19.6 կմ ընդհանուր երկարության, 86 կամուրջ և 102 կմ ընդհանուր երկարության 60 թունել։
Որպես նախագիծ՝ իհարկե, բավականին տպավորիչ էր, իր ժամանակի համար՝ մեգանախագիծ, բայց․․․
Այսօր, երբ թվացյալ ապաշրջափակումը Հայաստանի համար ավելի նման է «անակոնդայի պարույրի», առավել քան արդիական է դառնում հայ–իրանական երկաթուղու կառուցման գաղափարը՝ որպես Հայաստանի կոմունիկացիոն և լոգիստիկ համակարգի ինքնավարության հավելյալ հնարավորություն»։