Երկուշաբթի, 09 փետրվարի, 2026 թ.
|
Ստեփանակերտում`   +7 °C

414 տարվա վաղեմության հայկական ջրհոր է հայտնաբերվել Ուկրաինայի Յազլովեց գյուղում

414 տարվա վաղեմության հայկական ջրհոր է հայտնաբերվել Ուկրաինայի Յազլովեց գյուղում
918
Կիրակի, 23 նոյեմբերի, 2025 թ., 11:47

Ուկրաինայի Տերնոպոլի մարզում հայտնաբերվել է 414 տարվա վաղեմություն ունեցող եզակի հայկական հուշարձան։ Ինչպես հայտնել են Ուկրաինայի հայերի միությունից, հետազոտողները պատահաբար գտել են հայկական ջրհոր, որը կառուցվել է 1611 թվականին Յազլովեց գյուղում։

Սովորական քարաշեն աղբյուրի տեսք ունեցող կառուցվածքի մեծ մասն իրականում գտնվում է գետնի տակ, որտեղ իրականացված է բարդ հիդրոտեխնիկական համակարգ, որը ստեղծվել է հայ վարպետների կողմից XVII դարում։ Հզոր ակունքից եկող ջուրը նախ լցվում է ստորերկրյա ավազանի մեջ, ապա դուրս է գալիս մակերես։

Աղբյուրի պատին պահպանվել է լատիներեն և հայերեն արձանագրությամբ սալաքար․ «Սա կառուցեց հայ Հակոբը 1611 թվականին՝ հանուն հասարակության բարօրության։ Այս խաչը և աղբյուրը Հակոբի և նրա եղբոր Ստեփանի ձեռքի գործն են։ Աբրահամ քարագործ վարպետը իր աշխատանքը կատարել է մեծ նվիրվածությամբ»։

Սալիկի վերին մասում պատկերված է բացված թևերով արծիվ, որի տակ փորագրված է խաչ՝ բարդ բուսական զարդանախշով։

Հետազոտողները ենթադրում են, որ Յազլովեցում բնակվող հայ վարպետները նաև պատրաստել են տեղական եկեղեցու դարպասների և հին ամրոցի քանդակները։

Կարդացե՛ք նաև