Երեքշաբթի, 21 ապրիլի, 2026 թ.
|
Ստեփանակերտում`   +6 °C

«Հեզբոլլահ»-ի շտաբի պետն սպանվել է իսրայելական հարվածի արդյունքում. Al Hadath

«Հեզբոլլահ»-ի շտաբի պետն սպանվել է իսրայելական հարվածի արդյունքում. Al Hadath
1394
Կիրակի, 23 նոյեմբերի, 2025 թ., 21:47

«Հեզբոլլահ»-ի շտաբի պետ Աբու Ալի Թաբթաբավին սպանվել է Լիբանանի մայրաքաղաք Բեյրութի վրա իսրայելական անօդաչու թռչող սարքի ճշգրիտ հարվածի արդյունքում: Այս մասին նոյեմբերի 23-ին հայտնել է Al Hadath-ը։

Հեռուստաալիքի տվյալներով՝ Թաբթաբավին զբաղեցնում էր խմբի ռազմական թևի կարևոր պաշտոն և վերահսկում էր օպերատիվ պլանավորումը: Հարվածի թիրախը Լիբանանի մայրաքաղաքի հարավային շրջանն էր, որտեղ գտնվում են «Հեզբոլլահ»-ի օբյեկտները։

Ավելի ուշ Իսրայելի վարչապետի գրասենյակի մամուլի ծառայությունը հայտարարության մեջ նշել է, որ գործողությունը իրականացվել է վարչապետի հրամանով: Հայտարարության մեջ չի նշվում, թե ում է Իսրայելի պաշտպանության բանակն անվանում «շտաբի պետ»։

«Մի քանի րոպե առաջ Բեյրութի կենտրոնում Իսրայելի պաշտպանության բանակը հարձակվել է «Հեզբոլլահ»-ի շտաբի պետի վրա, որը վերահսկում էր կազմակերպության հզորացումը և վերազինումը: Վարչապետ Բենիամին Նեթանյահուն հրամայել է հարվածը պաշտպանության նախարարի և գլխավոր շտաբի պետի առաջարկությամբ», - ասվում է հայտարարության մեջ։

Նեթանյահուն նախկինում ընդգծել էր, որ լիբանանյան «Հեզբոլլահ»-ը փորձում է վերականգնել իր ուժերը և վերազինվել Իսրայելի պաշտպանության բանակի հարվածներից հետո։ Նա հայտարարեց, որ Իսրայելը թույլ չի տա խմբավորմանը հզորանալ և կօգտագործի ինքնապաշտպանության իր իրավունքը՝ համաձայն գործող հրադադարի։