«Կողմերն ունեն շատ լավ աշխատանքային տարբերակ». Մարկո Ռուբիո

ԱՄՆ-ի պետքարտուղար Մարկո Ռուբիոյի և Ուկրաինայի նախագահի գրասենյակի ղեկավար Անդրեյ Երմակի խոսքերով՝ Ժնևում Ուկրաինայի և ԱՄՆ-ի պատվիրակությունների միջև հանդիպումն ավարտվել է, քննարկվել է ԱՄՆ-ի առաջարկած «խաղաղության ծրագիրը»։

Ռուբիոյի խոսքով՝ կողմերն ունեն «շատ լավ աշխատանքային տարբերակ»։ Ռուբիոն պարզաբանել է, որ թիմերն այժմ աշխատում են իրենց տրված առաջարկների վրա՝ կատարելով փոփոխություններ «տարաձայնությունները նեղացնելու» և այն բանին մոտենալու հույսով, որի շուրջ և՛ Ուկրաինան, և՛ ԱՄՆ-ն կարող են համաձայնության գալ։

Երմակը հաստատել է, որ հանդիպումն արդյունավետ է եղել, կողմերը «շատ լավ առաջընթաց» են գրանցել և շարժվել դեպի արդար և երկարատև խաղաղություն։ «Ուկրինֆորմ»-ի փոխանցմամբ՝ Երմակը հավելել է, որ պատվիրակությունների երկրորդ հանդիպումը տեղի կունենա ժամեր անց։

Ռուբիոն նշել է, որ ԱՄՆ-ի վարչակազմը վերջին մի քանի ամիսների ընթացքում զգալի տեղեկություններ է ստացել այն մասին, թե որ հարցերն են իսկապես կարևոր Ռուսաստանի համար։ Նա նշել է, որ ամերիկյան և ուկրաինական պատվիրակություններն այժմ աշխատում են ծրագրի ճշգրտումների վրա, և երկու երկրների ղեկավարությունները դեռևս չեն հաստատել այդ փոփոխությունները։ Պետքարտուղարը նաև ընդգծեց, որ ցանկացած ծրագիր պահանջում է ԱՄՆ-ի նախագահ Դոնալդ Թրամփի հաստատումը։

Նրանք հրաժարվել են պատասխանել լրագրողների հարցերին։ Ռուբիոն խոստացել է պատասխաններով վերադառնալ ավելի ուշ, քանի որ «գործընթացը դեռ շարունակվում է» և անհրաժեշտ է հետագա աշխատանք։