Ադրբեջանն ու Կատարն ամրապնդում են համագործակցությունը

Նոյեմբերի 24-25-ը Կատարի մայրաքաղաք Դոհայում տեղի է ունեցել Ադրբեջանի և Կատարի կառավարությունների միջև համատեղ տնտեսական, առևտրային և տեխնիկական հանձնաժողովի չորրորդ նիստը, ինչպես նաև Ադրբեջան-Կատար համատեղ գործարար խորհրդի առաջին նիստը։

Արտակարգ իրավիճակների նախարարության (ԱԻՆ) մամուլի ծառայության տվյալներով՝ միջոցառումներին մասնակցելու համար Կատար է ժամանել հանձնաժողովի ադրբեջանցի համանախագահ, արտակարգ իրավիճակների նախարար Քամալադին Հեյդարովի գլխավորած պատվիրակությունը։

Այցի ընթացքում տեղի են ունեցել մի շարք երկկողմ հանդիպումներ։ Նոյեմբերի 24-ին Քամալադին Հեյդարովը հանդիպել է Կատարի վարչապետ և արտաքին գործերի նախարար շեյխ Մոհամմեդ բին Աբդուլռահման բին Ջասիմ ալ Թանիի հետ։ Հանդիպման ընթացքում ընդգծվել է, որ Ադրբեջանի նախագահ Իլհամ Ալիևի և Կատարի էմիր շեյխ Թամիմ բին Համադ ալ Թանիի «իմաստուն և հեռատես քաղաքականության շնորհիվ» երկու երկրների միջև բազմակողմանի կապերը անընդհատ ընդլայնվում են։