ԱԺ նախկին պատգամավոր Սամվել Ֆարմանյանի ֆեյսբուքյան գրառումը. «Անքաղաքավարի հուշում ընդդիմությանը Քաղաքականության ու քաղաքական հաղորդակցության մեջ կա հայտնի մի տերմին՝ լրատվական օրակարգի ձևավորում - news agenda setting: Դա այն է, երբ քաղաքական դերակատարը՝ լինի պետության ղեկավար, ընդդիմության առաջնորդ, կուսակցության լիդեր, ընտրություններում թեկնածու, թե այլք, ձգտում են դառնալ լրատվական օրակարգը թելադրող առաջին ջութակը: Այսինքն, հենց իրենք թելադրեն, թե ինչը լուսաբանեն լրատվամիջոցները որպես առաջնային խնդիր, ինչի մասին խոսեն ու ինչ քննարկի ժողովուրդը, ինչի մասին արտահայտվեն քո աջակիցներն ու մրցակիցները: Միտքը պարզից պարզ է, կարծում եմ: Ու հեչ կարևոր չէ, թե ինչ լույսի ներքո են լրատվամիջոցներն ու հանրային հաղորդակցության դերակատարները լուսաբանում-արտահայտվում քո թելադրած օրակարգի շուրջ: Ծափահարում են, հայհոյում են, թե չեզոք են դիրքավորվում, իրոք, հեչ էական չի: Որովհետև, եթե դու ես թելադրում լրատվական օրակարգը, չէ՞, որ ինքդ ես որոշում՝ ինչ թեմա դարձնես առաջնային, ու ըստ այդմ, դու ես որոշում՝ քեզ հայհոյե՞ն, ծափահարե՞ն, հիասթափվե՞ն, թե՞ անտարբեր մնան: Կարևորը, որ չթողնես, որ քեզանից դուրս որևէ մեկը մոտենա լրատվական օրակարգ թելադրողի հաղթական դիրքին: Վաղը քեզ պետք կլինի, որ քեզ ծափահարե՞ն, օրակարգ կբերես այնպիսի հարցեր ու կարտահայտես այնպիսի մոտեցումներ, որ մեծամասնությունը հաստատ կծափահարի: Պարզ սոցիոլոգիա: Սիրելի ընդդիմությու՛ն: Նիկոլի բոլոր քայլերն այս պարզագույն հարթությունում են: Ինքն ամեն գնով պահում է լրատվական օրակարգ թելադրողի իր գնալով էլ ավելի բյուրեղացող մոնոպոլ դիրքը: Ընդ որում, հանուն ճշմարտության, ունենալով իշխանական ռեսուրսի ընձեռած անհավասար պայմաններն ու առավելությունը, բայցև մեկնարկային մեծ բացեր՝ վարկաբեկվածություն ու դավաճան-ստախոսի համազգային համբավ, բաց մրցակցության մեջ, այդուհանդերձ, հաղթում է մեզ՝ ընդդիմությանը: Եթե մենք այս պարզագույն իրողությունը չհասկանանք՝ անհնար է Նիկոլին հեռացնել իշխանությունից: Եթե ընդդիմությունն իր ամբողջության մեջ չի կարողանում դառնալ կամ գոնե մոտենալ լրատվական օրակարգ թելադրողի դիրքին, իսկ դրա համար գործողությունների ու ռեսուրսների գրագետ ու տևական համադրում է պահանջվում, չկա բանաձև Նիկոլին իշխանության հեռացնելու: Ոչ թե Նիկոլին, այլ որևէ մեկին: Ուղղակի չկա: Սուրբ Էջմիածնի շուրջ կատարվողը ես նման ակնոցներով եմ նայում: Ու եկեք հասկանանք միասին, որ Նիկոլը հաղթում է, քանի որ ինքն է թելադրել ու թելադրում լրատվական այս օրակարգը: Մենք բոլորս արձագանքողի դերում ենք: Պետք չի ինքներս մեզ խաբենք, թե ժողովրդի մեծամասնությունն անտարբեր է կամ չի աջակցում Նիկոլի հակաեկեղեցական այս արշավին: Նիկոլի համար կարևորը դա չի, իշխանությունը պահելու տեսանկյունից կարևորն այն է, որ ինքը պահպանի լրատվական օրակարգ թելադրողի իր մոնոպոլ դիրքը: Վաղը, երբ իրեն պետք եղավ, վստահ եղեք, որ այդ մոնոպոլ դիրքից կանի քայլեր, որոնք ժողովրդի մեծամասնության սրտով կլինի: Պետք եղավ անգամ կծնկի Սուրբ Էջմիածնում ու կհայտարարի, որ այսքան ժամանակ ինքը չար ուժերի ազդեցության տակ է եղել, իսկ հիմա դարձի է եկել: Ու ձեր ասած հավատացյալ հայերը, որ այսօր անիծում են նրան, արդեն կծափահարեն իրեն: Էլի ասեմ, իշխանությունը պահելու տեսանկյունից կարևորն այն չի, թե ինչ ես ասում ու ինչպես են արձագանքում դրան մարդիկ, կարևորն այն է, որ դու ես լրատվական ու քաղաքական միակ օրակարգ թելադրողը: Հ.Գ. Ամերիկյան համալսարանում դասավանդելիս իմ ուսանողնորի հետ այս թեման քննարկելիս մի միտք էի փոխանցում նրանց. «եթե ընդդիմությունը կարողանում է լրատվական-քաղաքական օրակարգ թելադրել, համարեք, որ այն արդեն իշխանության միջանցքներում է ու շուտով կդառնա իշխանություն»: Սա ամաչելով եմ գրում: Վախով, թե կարող եմ ինձ չճանաչողների մոտ անգամ մեծամիտ մեկի տպավորություն թողնել: Բայց, ախր, սա պարզագույն, ուղղակի այբբենական ճշմարտություն է: Հ.Գ. 2. Անգամ նման խեղկատակություններն են, վստահ եղեք, բերածս տրամաբանության մեջ. ցանկացած գնով լինել լրահոսի առանցքում՝ թելադրել դրա օրակարգը»:
