«Պետականության փոխարեն կառուցվել է մի ազգային ախոռ, որից կարող էր դուրս գալ միմիայն Նիկոլ». Արգիշտի Կիվիրյան

Վերլուծաբան Արգիշտի Կիվիրյանը գրում է. «Լավ, եկեք շատ կարճի մեջ մի բան բացատրեմ, որ հասկանաք, անկախությունից ի վեր մենք ունեցել ենք պետություն, թե չէ։ Նայեք, պետությունը այլ կազմակերպություններից տարբերվում է նրանով, որ ինքը ունի ուժ կիրառելու բացառիկ իրավունք։ Դրանով՝ այդ ուժ կիրառելու մոնոպոլիայով ա ինքը տարբերվում այլ բոլոր տեսակի կառույցներից։ Հիմա դա լավ ա, թե վատ, բայց դա ա, ու երբ իր ուժ կիրառելու բացառիկ իրավունքը լղոզվում ա, կարելի է ասել, որ պետություն՝ որպես այդպիսին, չկա։ Հիմա գանք ու անկախությունից իր վեր վերհիշենք հայոց պատմությունը՝ 1996 թվական ընտրությունները ու ետընտրական զարգացումները։ Թողնենք հիմա մի կողմ, կեղծումները ու մնացածը՝ Հայաստանի այդ պահի իշխանությունները կարողացան ճնշել ժողովրդական ընդվզումը ոչ թե ոստիկանությանբ, ոչ թե բանակով, ոչ թե ԱԱԾ-ով, այլ Երկրապահով (որոնք այդ գիշերը Վազգենի եւ Մանվելի ղեկավարությամբ տեղակայված էին Սիրահարների այգում), այսինքն ինչ-որ կիսալեգալ հասարակական կազմակերպությամբ։ Եթե ժողովուրդին ճնշեին ուժային կառույցներով, էլի կլիներ անընդունելի, բայց դե հիմա կասեինք պետություն ա, օգտվում ա իր բացառիկ իրավունքից։ Բայց երբ պետությունն իր ուժ կիրառելու բացառիկ իրավունքը փոխանցում ա ինչ-որ մեկին, դա նշանակում ա, որ ինքը բացեիբաց ասում ա, որ այստեղ պետություն չկա։ Անցան տարիներ, գանք 2008 թվականի մարտի դեպքերին։ Էլի մի կողմ թողնենք ամեն ինչը, բայց երբ պետությունը իր ուժ կիրառելու բացառիկ իրավունքը այս անգամ էլ տալիս ա օլիգարխների թիկնազորներին՝ նրանց բաժանելով հանդերձանք ու զենք, նորից ընդունում ա, որ պետություն նորից չկա։ Հիմա գանք 2018 թվական, ու երբ քո փառապանծ բանակի լավագույն ստորաբաժանումը դուրս ա գալիս ու միանում ա փողոցում հավաքվածներին, նշանակում ա՝ դու ոչ բանակ ունես, ոչ էլ պետություն, որովհետեւ քո բանակի, պետության առանցքային անվտանգության երաշխավորի մոտ ուղղահայացը չի գործում, ոնց որ չէր գործում 2020 թվականի պատերազմի օրերին։ Այս շատ կարճ էքսկուրսը լրիվ բավարար ա, հասկանալու համար որ անկախությունից ի վեր այստեղ պետություն չի եղել, պետականության փոխարեն կառուցվել ա մի ազգային ախոռ, անասնագոմ, որից կարար դուրս գալ միմիայն Նիկոլ»: