«Ռուսաստանը չի սկսել պատերազմը, անեքսիայի չի ենթարկել Ղրիմը». Պուտինի հարցազրույցը India Today-ին

India Today-ը հրապարակել է Ռուսաստանի նախագահ Վլադիմիր Պուտինի հետ հարցազրույցը: Ռուսաստանի առաջնորդը, ի թիվս այլնի, մեղադրել է Արևմուտքին Ռուսաստանի դեմ պատերազմ սանձազերծելու մեջ և կոչ է արել Ուկրաինային բանակցություններ վարել։

Ռուսաստանի նախագահը հայտարարել է, որ Ռուսաստանի «հատուկ գործողությունը» Ուկրաինայում չպետք է դիտարկել՝ որպես պատերազմի սկիզբ, այլ որպես՝ այն ավարտելու փորձ: Ուկրաինայում պատերազմը սանձազերծել են արևմտյան երկրները՝ «ուկրաինացի ազգայնականների» օգնությամբ, պնդել է Ռուսաստանի առաջնորդը: Պուտինը հայտարարել է, որ Ռուսաստանը ութ տարի փորձել է կարգավորել Ուկրաինայում ստեղծված իրավիճակը «խաղաղ ճանապարհով»: Նա կրկնել է, որ Մինսկի համաձայնագրերը ստորագրվել են խաղաղ կարգավորման ակնկալիքով, սակայն «արևմտյան առաջնորդները բացահայտ խոստովանել են, որ երբեք չեն մտադրվել հետևել դրանց», ստորագրելով դրանք՝ «թույլ տալով Ուկրաինային զինվել»:

Պուտինը նաև ասել է, որ Ռուսաստանը չի անեքսիայի ենթարկել Ղրիմը, այլ «պարզապես օգնության է հասել այն մարդկանց, ովքեր չէին ցանկանում իրենց ճակատագիրը կապել Ուկրաինայում պետական ​​հեղաշրջում կազմակերպածների հետ»։ Նրա հայտարարության համաձայն՝ ղրիմցիները ԽՍՀՄ փլուզումից հետո ընդունել են իրենց դիրքն անկախ Ուկրաինայի կազմում, բայց հրաժարվել են ապրել քաղաքական ցնցումների և անկանխատեսելի հետևանքների ռիսկի պայմաններում։ Պուտինը հավելել է, որ Ղրիմի բնակիչների նկատմամբ «կա ոչ միայն ճնշման, այլև ուղղակի հաշվեհարդարի սպառնալիք», և Ռուսաստանը միջամտել է նրանց պաշտպանելու համար։ «Մենք միշտ կպաշտպանենք մեր շահերը և մեր ժողովրդին», - ասել է նա։

Ռուսաստանի նախագահի խոսքով՝ Ուկրաինան պետք է գիտակցի, որ բանակցությունները հակամարտությունը լուծելու լավագույն միջոցն են։

Պուտինը նշել է, որ ինքը և ԱՄՆ-ի նախագահի հատուկ դեսպանորդ Սթիվեն Ուիթքոֆը կարողացել են մանրամասն քննարկել ուկրաինական կարգավորման «խաղաղության ծրագրի» բոլոր կետերը։

ԱՄՆ-ի նախագահ Դոնալդ Թրամփը քաղաքականության մեջ առաջնորդվում է իր սեփական շահերով, ինչպես որ Ռուսաստանը առաջնորդվում է իր սեփական շահերով, հայտարարել է Ռուսաստանի նախագահը։ «Նախագահ Թրամփն ունի իր սեփական օրակարգը, իր սեփական նպատակները, մինչդեռ մենք կենտրոնանում ենք մեր սեփականի վրա, որոնք ուղղված չեն որևէ մեկի դեմ, այլ ուղղված են մեր համապատասխան շահերի պաշտպանությանը», - ասել է Պուտինը՝ մեկնաբանելով ամերիկյան մաքսատուրքերն ու պատժամիջոցները։

Նա նաև նշել է, որ Թրամփը լիովին անկեղծ է Ուկրաինայի պատերազմի հետ կապված իր ջանքերում. «Նրա անկեղծությունն անկեղծ է։ Ես կարծում եմ, որ Միացյալ Նահանգները ակտիվորեն փնտրում է այս խնդրի լուծումը»։

Ռուսաստանի նախագահը հավելել է, որ ռուսական նավթի մատակարարումները Հնդկաստան ընթանում են սահուն։ Պուտինը նշել է, որ ինքը և Հնդկաստանի վարչապետ Նարենդրա Մոդին երբեք հարաբերություններ չեն կառուցել որևէ մեկի դեմ, այլ միայն Ռուսաստանի և Հնդկաստանի օգտին։