«2026-ին Երևան քաղաքի իշխանությունն աննախադեպ պարգևատրում է նախատեսել իր համար»․ Արմենակ Դանիելյան

Երևանի ավագանու «Մայր Հայաստան» խմբակցության անդամ Արմենակ Դանիելյանը ֆեյսբուքյան էջում տեսանյութ է հրապարակել՝ կից գրելով․ «Երևանի իշխանությունները վերջին 2-3 տարվա ընթացքում մայրաքաղաքի փողոցներում ծառերի սպանդ են արել, ծառերի կոտորած, ծառերի եղեռն են արել, իրենց արարքն արդարացնելով, իրենց գործողությունները մեկնաբանելով՝ թե իբր այդ ծառերը արդեն մեծ էին և իբր ֆունկցիոնալ չէին, իբր իրենց նպատակին չէին ծառայում։
․ Երևանի խցանումների վերացման կամ նվազեցման, մեղմացման համար, քաղաքի երթևեկության բեռնաթափման համար պետք է ոչ թե կարմիր կետագծերում կայանման գումարը թանկացվեն, այլ մայրաքաղաքի կենտրոնում և Երևան մտնող 4 ուղղություններում՝ քաղաքի արվարձաններում ստորգետնյա և վերգետնյա ավտոհանգրվաններ կառուցվեն։
․ 2026թ․-ին Երևան քաղաքի իշխանությունն աննախադեպ պարգևատրում է նախատեսել իր համար։ 2026թ.-ին նախատեսվել է 1,128,000,000 դրամ (1 միլիարդ 128 միլիոն) պարգևավճարային ֆոնդ, որն ավել է 2025թ.-ին նախատեսված պարգևավճարային գումարից 414,000,000 դրամով (414 միլիոն) կամ 63%-ով։
․ Երևան քաղաքի ենթակայությամբ գործող հիմնարկների՝ պոլիկլինիկաների, մանկապարտեզների, շախմատի, երաժշտական և արվեստի դպրոցների աշխատակիցների (հավաքարարից մինչև տնօրեն) աշխատավարձը պետք է վերանայել, պետք է բարձրացնել։ Արդարացի չի, երբ նոր ստեղծվող համայնքային հիմնարկի վարչատնտեսական մասի աշխատակիցները ավելի շատ են, ավելի բարձր են վարձատրվում, քան թե դաստիարակներն ու դայակները, բժիշկներն ու բուժքույրերը, մարզիչներն ու ուսուցիչները»։