«Դանիել ջան, անհիմն ադրբեջանական խոսույթ ես տարածում». Մհեր Հակոբյան

Ռազմական հարցերով վերլուծաբան Մհեր Հակոբյանի ֆեյսբուքյան գրառումը. «Պատասխանելով Դանիել Իոաննիսյանին.
Դանիել ջան, տերմինները սխալ ես կիրառում:
Նախ, «մենք»՝ այսինքն ՀՀ-ն, ոչինչ չէր օկուպացրել, «մենք» իրավաբանորեն այնտեղ չկայինք:
Երկրորդ, Արցախի Հանրապետությունը ևս ոչինչ չէր «օկուպացրել», քանի որ, իրացնելով ազգերի ինքնորոշման իր իրավունքը և դա անելով ինչպես միջազգային, այնպես էլ ԽՍՀՄ օրենսդրության սահմաններում, արցախահայությունը պատշաճ հակահարված էր տվել ագրեսոր մետրոպոլիային ու ստեղծել էր անվտանգության գոտի: Այս իրավունքը ամրագրված է ՄԱԿ կանոնադրության նախաբանում և համարվում է առաջնային: Հենց այս իրավունքի ուժով են անկախացել օրինակ Աֆրիկայի շատ երկրներ:
Երրորդ, ի՞նչ է նշանակում «ԼՂԻՄ-ի մեջ չմտնող (ու բոլոր-բոլոր չափանիշներով Ադրբեջանին պատկանող)» տերմինը: Բերեմ Ազգերի Լիգայի քարտեզը և ցույց տամ, որ 1920թ-ի դեկտեմբերին այդ տարածքները Ադրբեջանական Խորհրդային Հանրապետությանը չէի՞ն պատկանում: Թե՞ պետք է պնդենք, որ Ռուսաստանը, որ օկուպացրել էր ինչպես Հայաստանի, այնպես էլ Ադրբեջանական Առաջին հանրապետությունները, այնքան իրավական լիազորություն ուներ, որ 1921թ-ի հուլիսի 5-ին ստեղծեր ԼՂԻՄ ու մի հատ էլ որոշեր նրա տարածքները:
Ու սա՝ ես դեռ չեմ խոսում երևույթի պատմական կողմի մասին, որ բոլոր այդ տարածքները մինչև Կուր գետ պատմական Հայաստան են:
Կարծես տրամաբանական և ճիշտ, բայց, կներես, անհիմ ադրբեջանական խոսույթ ես տարածում»: