«Ավելի ճիշտ և թիրախային խոցում կլինի Հայ Առաքելական եկեղեցին ներառել կառավարության կազմում». Նարինե Մկրտչյան

Մամուլի ազգային ակումբի նախագահ Նարինե Մկրտչյանի ֆեյսբուքյան գրառումը. «Հայոց եկեղեցու մոտ պետական դրոշ, օրհներգի կատարում ժամերգությունների ընթացքում․ այդպես լավ չէ, ավելի ճիշտ և թիրախային խոցում կլինի Հայ Առաքելական եկեղեցին ներառել կառավարության կազմում, այն էլ ոչ թե նախարարության, այլ կառավարությանը կից կոմիտեի կարգավիճակով։ Այդ դեպքում վարչապետ Փաշինյանը հնարավորություն կստանա նշանակել կոմիտեի ղեկավարին, տվյալ դեպքում՝ կաթողիկոսին։
Եվ քանի դեռ Ն․ Ս․ Օ․ Տ․ Տ․ Գարեգին Երկրորդը զարմանալի լռություն է պահպանում այս տիրադավ խառնակչությունների ընթացքում, Փաշինյանի միահեծան կառավարումը և հոգևոր իշխանության յուրացումն ամբողջացնելու՝ առավել արագընթաց լուծման այլ տարբերակ էլ կարող է կյանքի կոչվել։ Այն է՝ Նիկոլ Փաշինյանն ինքն իրեն հռչակում է Հայաստանի կաթողիկոս՝ այս դեպքում «ամենայն հայոց կաթողիկոս» հասարակայնորեն ընդունված «սարսափազդու» ձևակերպումը դուրս է մղվում, և Հայաստանում հոգևոր ոլորտում ստեղծվում է երկիշխանություն։
Սակայն բոլորը գիտեն, որ Փաշինյանը ոչ միայն իշխանություն կիսող չէ, այլև այդ իշխանությունից մեկ ծեղ անգամ չի զիջի։ Եվ մնում է վերջին հարվածը հասցնել «ցարի գահին»․ միավորել բոլոր աղանդավորներին նորահռչակ Սուրբ Նիկոլոս կրոնի և եկեղեցու շուրջ։ Այս դեպքում Նիկոլ Փաշինյանի պայքարն իրական արդյունք կտա՝ աղանդավորների կուռ շարքերի շնորհիվ ապահովելով կայուն ընտրազանգված և ընտրաքվե, ինչպես թերևս նախորդ ընտրություններում էին ապահովել։
Սակայն Փաշինյանը պետք է հիշի, որ ժամանակը, մինչև առաջիկա խորհրդարանական ընտրություններ, կարճ է, իսկ Հայ Առաքելական եկեղեցին պահպանելու՝ հայության ձգտումները՝ մեծ, դրա համար էլ վարչապետը պետք է մի կողմ դնի պետական կառավարման բոլոր գործերը և իր ողջ եռանդն ու պետական միջոցները ներդնի նոր կրոնի և նոր եկեղեցու հիմնադրման գործում։
Սուրբ Նիկոլոսը միակ նորահայտ սուրբը, եթե կուզեք՝ նոր Աստվածը կլինի, որին կհավատա Նիկոլ Փաշինյանը։ Եվ անկեղծորեն կծնրադրի նրա առջև»։