«Փաշինյանն այս միտքը շրջանառել է, որպեսզի շարունակի պառակտել հանրությանը». Սարո Սարոյան

Քաղաքական վերլուծաբան Սարո Սարոյանի ֆեյսբուքյան գրառումը. «Կարդում եմ լրահոսում՝ «Օրհներգը պատարագից առաջ հնչեցնելու առաջարկից հետո Փաշինյանը հիմա էլ առաջարկում է դրոշը կախել»։
Նայում եմ ֆեյսբուքյան գրառումները, բոլորը հակված են դրա «դեմն ու կողմը» քննարկել։ Իսկ այն, ինչը պետք է քննարկվի՝ չի քննարկվում։
Փաշինյանն այն տեխնոլոգիայի վարպետն է, որը մարդկանց մշտապես բաժանում է հակադիր ճամբարների։ Նա վերը նշված միտքը չի շրջանառել այն նպատակով, որպեսզի այդտեղ ճշմարտություն դուք փնտրեք։ Նա դա արել է, որպեսզի շարունակի պառակտել հանրությանը։ Իր կողմից վաղուց կիրառվում են «տեխնոլոգիական պարույրներ», որոնք նույն խնդրի շուրջ մի նոր դետալ ավելացնելով՝ խորացնում են մտքերի խճճվածությունը ու հանրության ապակողմնորոշվածությունը։ Երեկ, օրինակ, նա նույն թեման շահագործելով՝ ասում էր, որ պետությունն է հիմնել եկեղեցին 301 թ․։ Կլինեն բազում մասնագետներ, որոնք դրա հիմնավորումները կարող են տալ, մյուսները կհակադրվեն դրան։ «Պարույրի տեխնոլոգիան» ենթադրում է, որ հիմնվելով կիսաճշմարտությունների վրա՝ չպետք է կանգ առնել մի որևէ արդյունքի վրա, պետք է խորացնել ապակողմնորոշումը նույն ընթացքի մեջ։ Պետք է ուշադրություն դարձնել, որ դրանից առաջ նա նույն խնդիրը «ծամծմելիս», եկեղեցիներում պետական օրհներգը հնչեցնելու թեման շրջանառեց։ Այսօր, արդեն, դրոշի թեման է բարձրացնում։ Վաղն էլ, օրինակ, կխոսի, որ եկեղեցու վրա պետք է քանդակվի պետական զինանշանը, որպեսզի պետություն-եկեղեցի հարաբերություններն ամրանան և այլն։
Սա մեզ մոլորեցնելու համար է, տեխնոլոգիան է այդպիսին։ Չպետք է տրվել դրան, պետք է արժեզրկել ու հումորի դաշտ տանել նրա այդ ձեռնարկումները․․․»: