«Ուկրաինան պատրաստ է համաձայնել Դոնբասում ապառազմականացված գոտու ստեղծմանը». #LeMonde

Ուկրաինան պատրաստ է համաձայնել Դոնբասում ապառազմականացված գոտու ստեղծմանը, հաղորդում է Le Monde-ն։ «Կիևը համաձայնել է ԱՄՆ-ի և Ռուսաստանի հետ բանակցությունների հիմնական կետերից մեկին՝ ընդունելով Դոնբասում ապառազմականացված գոտու ստեղծումը»,- գրում է Le Monde-ն:

Նշվում է, որ տվյալ կետը ներառված էր Ուկրաինայի նախագահ Վլադիմիր Զելենսկու կողմից վերամշակված և չորեքշաբթի երեկոյան ԱՄՆ նախագահ Դոնալդ Թրամփին հանձնված ԱՄՆ խաղաղության ծրագրում: Առաջարկի մշակմանը մասնակցել են Ֆրանսիայի նախագահ Էմանուել Մակրոնը, Մեծ Բրիտանիայի վարչապետ Քիր Սթարմերը և Գերմանիայի կանցլեր Ֆրիդրիխ Մերցը:

Կիևի կարծիքով ապառազմականացված գոտին կստիպի ուկրաինական և ռուսական զորքերին դուրս գալ Դոնբասի ներկայիս առաջնագծից։ Այն կարող է դրվել միջազգային ուժերի, մասնավորապես՝ Միացյալ Նահանգների հսկողության տակ՝ ռուսական հետագա ագրեսիան կանխելու համար։

«Սա հակամարտության դադարեցման համար բնական ձևաչափ է, հաշվի առնելով, որ տարածքի մի մասը, ցավոք, դե ֆակտո կմնա ռուսական օկուպացիայի տակ»,- նշել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը։