Երկուշաբթի, 23 փետրվարի, 2026 թ.
|
Ստեփանակերտում`   +4 °C

Իրանում ՀՀ դեսպանատունը թաքցնում է իրանական կողմի դժգոհությունը «Թրամփի ուղու» վերաբերյալ

Իրանում ՀՀ դեսպանատունը թաքցնում է իրանական կողմի դժգոհությունը «Թրամփի ուղու» վերաբերյալ
1202
Երկուշաբթի, 15 դեկտեմբերի, 2025 թ., 22:56

Իրանում ՀՀ դեսպան Գրիգոր Հակոբյանը հանդիպել է Իսլամական հեղափոխության գերագույն առաջնորդի միջազգային հարցերով խորհրդական Ալի Աքբար Վելայաթիի հետ: «...Անդրադառնալով տարածաշրջանի հաղորդակցային ուղիների ապաշրջափակման գործընթացին՝ դեսպան Հակոբյանն ընդգծել է, որ «ԹՐԻՓ ուղին» կյանքի է կոչվելու պետությունների տարածքային ամբողջականության, ինքնիշխանության, իրավազորության և փոխադարձության սկզբունքների հիման վրա և ստեղծելու է լայն հնարավորություններ տարածաշրջանի փոխկապակակցվածության ու տնտեսական զարգացման համար»,- հանդիպման ժամանակ այսպես կոչված «Զանգեզուրի միջանցք»-ի մասին անդրադարձից այսքանն է գրում Իրանում ՀՀ դեսպանության ֆեյսբուքյան էջը:
Իրանական IRNA-ն, սակայն, փոխանցում է զրույցի ժամանակ Իրանի բարձրաստիճան պաշտոնյայի մտահոգությունները «Զանգեզուրի միջանցք»-ի վերաբերյալ: «Իրանը դեմ է Ադրբեջանի երկու հատվածները միացնող Հարավային Հայաստանով տարանցիկ միջանցք ստեղծելու՝ ԱՄՆ-ի նախագահ Դոնալդ Թրամփի ծրագրին՝ այն համարելով սպառնալիք իր անվտանգության համար:

Իրանի գերագույն առաջնորդի ավագ խորհրդականը հայտարարել է, որ Իրանն ի սկզբանե դեմ է եղել, այսպես կոչված, Զանգեզուրի միջանցքին, քանի որ Թեհրանը մերժում է տարածաշրջանային սահմանների ցանկացած փոփոխություն և զգուշանում է անվտանգության սպառնալիքներից:

Իրանի գերագույն առաջնորդի ավագ խորհրդականի խոսքով՝ այդ միջանցքը կարող էր ապահովել ՆԱՏՕ-ի ներկայությունն Իրանի հյուսիսում, ինչն անվտանգության լուրջ ռիսկեր կստեղծեր Իրանի հյուսիսային շրջանների և Ռուսաստանի հարավի համար։ Նա հավելել է, որ «Թրամփի պլանը», ըստ էության, նույն նախագիծն է, միայն փոփոխված անվանումով, և ներկայումս իրականացվում է ամերիկյան ընկերությունների՝ Հայաստան մտնելու միջոցով»,- փոխանցում է IRNA-ն։

Աղբյուրը`   Իրանում ՀՀ դեսպանություն