«ՀՀ իշխանության ընտրած տարբերակը ՀՀ-ն տանում է ավելի շուտ կառափնարան, քան որևէ լավ տեղ». Սևակ Հակոբյան

Լրագրող, պմբագիր Սևակ Հակոբյանի ֆեյսբուքյան գրառումը. «Հայաստանի իշխանությունը երկրի զարգացման, այսպես կոչված խաղաղության համար անփոխարինելի է համարում «Թրամփի ուղին», ըստ իրենց՝ միակ տարբերակն է։ Ի դեպ, մինչև հիմա Ադրբեջանի համար այն շարունակում է մնալ որպես «Զանգեզուրի միջանցք»։ Նույն միջանցնք է, ուղղակի որ կողմը որ անունը ցանկանում է՝ դա է տալիս։ Թե դրանից ինչ օգուտ կունենա Հայաստանը, հայտնի չէ, երևի հաշվարկ անգամ չկա․ միայն հայտնի է՝ ինչ են ստանում մեր թշնամի պետությունները՝ Թուրքիան ու Ադրբեջանը։ Բարեկամ Իրանը քթի տակ ստանում է մահացու թշնամի Ամերիկայի ներկայություն։
Իրանը բազմիցս հայտարարել է, որ երրրորդ կողմ տարածաշրջան մտցնելը խիստ վտանգավոր է և ինքը չի հանդուրժի։ Իրանի Արտաքին գործերի նախարար Աբբաս Արաղչին օրերս Մոսկվայում իր ռուս գործընկերոջ՝ Սերգեյ Լավրովի հետ հանդիպման ժամանակ ևս մեկ՝ ոչ ավելորդ անգամ հայտարարեց՝ տարածաշրջանի խնդիրները պետք է լուծեն բացառապես տարածաշրջանի երկրները։ Տարածաշրջանային անվտանգությունը դա՛ է ենթադրում։ Մնացածը վտանգավոր է։
Հիմա Հայաստանի իշխանությունը լրիվ հակառակ տրամաբանության մեջ է ու համարում է, որ իր բռնած ուղուն այլընտրանք չկա։ Իսկ ինչո՞ւ չկա։ Արդյո՞ք այլընտրանք չի կարող լինել օրինակ՝ Ռուսաստան-Իրան- Հայաստան ամուր գործակցությունը։ Օրինակ՝ այս տարի Ռուսաստանի և Իրանի միջև համապարփակ ռազմավարական գործընկերության մասին պայմանագիր ստորագրվեց, որը 20-ամյա կտրվածքով ուղենիշներ է սահմանում բոլոր ուղղություններով՝ ռազմատեխնիկականից մինչև թմրամիջոցների դեմ պայքար և այլն։ Հայաստանը չի՞ կարող նման՝ տարածաշրջանի անվտանգության ճարտարապետության մաս կազմել։ Իհարկե՝ կարող է։ Իսկ ինչու է հրաժարվում։
Հայաստանի անվտանգային այլ ռեալ տարբերակներ բնականաբար կան, բայց, տարբերակը, որն ընտրել է Հայաստանի իշխանությունը, ավելի շատ նմանվում է եվրոպական խոստումներով թուրքական ապագայի, որը Հայաստանին տանում է ավելի շուտ կառափնարան, քան որևէ լավ տեղ»: