Հրապարակվել է տոնական օրերին մետրոյի և ավտոբուսների աշխատանքային գրաֆիկը

Երևանի մետրոպոլիտենը տեղեկացնում է. «Ամանորի և Սուրբ Ծննդյան տոների կապակցությամբ Երևանի մետրոպոլիտենը կգործի հատուկ ռեժիմով։ Աշխատանքային ժամերում կլինեն որոշ փոփոխություններ՝ մայրաքաղաքի բնակիչների և հյուրերի համար ապահովելով առավելագույն հարմարավետություն։
Դեկտեմբերի 31-ին մետրոպոլիտենի աշխատանքը կսկսվի ժամը 07:00-ից և կշարունակվի մինչև 2026 թվականի հունվարի 1-ի ժամը 02:30-ը։
Խնդրում ենք ուշադիր լինել․ տեխնիկական որոշ հարցերով պայմանավորված՝ դեկտեմբերի 31-ի ժամը 23:45-ից մինչև հունվարի 1-ի ժամը 00:15-ը (30 րոպե) մետրոպոլիտենի «Հանրապետության հրապարակ» կայարանում գնացքները կանգառ չեն կատարելու»:

Հայտարարություն է տարածել նաև «Երևանի ավտոբուս» ՓԲԸ-ն. «Պայմանավորված Ամանորի և Սուրբ Ծննդյան տոներով՝ «Երևանի ավտոբուս» ՓԲԸ-ն կաշխատի հետևյալ աշխատանքային գրաֆիկով՝ առավելագույնս ապահովելով մեր քաղաքացիների և մայրաքաղաքի հյուրերի հարմարավետությունը՝
դեկտեմբերի 31-ին՝ 07:00-22:30,
հունվարի 1-ին և 2-ին՝ 08:00-22:30,
հունվարի 3-ին և 4-ին՝ 07:00-22:30»: