«Կգա մի պահ, որ Հայրապետն այլ տնօրինություններ կանի. ամեն բան ունի իր սահմանը». Հայր Ասողիկ

«Գերագույն հոգևոր խորհրդի նիստը չկայացավ, որովհետև քվորում չապահովվեց: Ինչո՞ւ, որովհետև 10 սրբազաններից մի քանիսը Գերագույն հոգևոր խորհրդի անդամ էին, և հակառակ, որ իրենց հրավերներ էր ուղղվել՝ ներկայանալու ժողովին և այնտեղ նաև իրենց բողոքն ու ընդվզումն արտահայտելու, նրանք չեկան: Ժողովական ատյանը չկայացավ»,- «Այսօր»-ի եթերում ասել է Մայր Աթոռ Սուրբ Էջմիածնի Արխիվի և Թանգարանների տնօրեն Հայր Ասողիկ աբեղա Կարապետյանը: Նա նշել է, որ դրանից հետո Հայոց Հայրապետը, ով եկեղեցու կարգ ու կանոնը պահպանողն ու պաշտպանողն է, անմիջապես իր կանոնական իրավունքով վճիռ կայացրեց՝ երեք անձանց դուրս դրեց Գերագույն հոգևոր խորհրդի կազմից և իրենց փոխարեն ուրիշներին նշանակեց, «որովհետև նա չէր կարող թույլ տալ, որ եկեղեցին իր գործունեության մեջ խափանվի»:

«Բայց 10 եպիսկոպոսներից երկուսը՝ Արցախի թեմի առաջնորդը և Արարատյան հայրապետական թեմի առաջնորդական փոխանորդը շարունակում են մնալ Գերագույն հոգևոր խորհրդի անդամ, վերջին ժողովի ժամանակ էլ իրենց դարձյալ մասնակցելու հրավեր էր գնացել: Բայց ամեն ինչ ունի իր չափն ու սահմանը: Շատ հավանական է՝ կգա մի պահ, որ Հայրապետը նաև այլ տնօրինություններ կանի, որովհետև նման ընթացքը խաթարում է եկեղեցու գործունեությունը, ամեն բան ունի իր սահմանը: Այդքան հորդորներից, կանչերից հետո, բնականաբար, արդար կլինի որևէ վճիռ, որ կկայացնի հայոց Հայրապետը»,- ընդգծել է Հայր Ասողիկը: