«Մարդկանց պետք է մոտիվացնել, որպեսզի նրանք ճիշտ օգտագործեն գալիք ընտրությունների հնարավորությունը». Էդմոն Մարուքյան

ԼՀԿ նախագահ Էդմոն Մարուքյանի ֆեյսբուքյան գրառումը․ «Նկատում եմ, որ վերջին շրջանում շատ քաղաքական գործիչներ և փորձագետներ հայտարարում են, թե իշխանափոխությունը հնարավոր է, բայց ոչ ընտրություններով, այլ՝ ինչ-որ այլ գործընթացների միջոցով։
Ուզում եմ հասկանալ՝ նմանատիպ մտքեր արտահայտող մարդիկ ո՞ւմ ջրաղացին են ջուր լցնում։ Արդյո՞ք հենց գործող իշխանությունների շահերից չի բխում, որ ժողովուրդը հույս չկապի ընտրությունների հետ և չմասնակցի դրանց։
Եթե չեք հավատում, որ ընտրություններով հնարավոր է հասնել իշխանափոխության, մինչև ընտրությունները փոխեք իշխանությունը, ինչո՞ւմն է խնդիրը…
Ես պնդում եմ, որ Հայաստանի Հանրապետությունում իշխանությունը պատկանում է ժողովրդին, և ժողովուրդն իր իշխանությունն իրականացնում է ընտրությունների և հանրաքվեների միջոցով։ Հայ ժողովուրդը ամիսներ անց պատմական հնարավորություն է ունենալու փոխելու իր իսկ կողմից ձևավորված իշխանությունը։
Մարդկանց պետք է մոտիվացնել, որպեսզի նրանք ճիշտ օգտագործեն այդ հնարավորությունը, այլ ոչ թե հուսալքել, ետ պահել ընտրություններից՝ դրա փոխարեն ոչ մի իրական լուծում չառաջարկելով»: