Թուրքիայում հայկական եկեղեցի կվերականգվի

Թուրքիայի մշակույթի և զբոսաշրջության նախարարությունը կաջակցի Իսկենդերունի Սրբոց Քառասնից Մանկանց հայկական եկեղեցու վերականգնմանը, որը լրջորեն վնասվել էր 2023 թվականի փետրվարի 6-ի երկրաշարժի ժամանակ: Այս մասին հայտարարել է Պոլսի Հայոց պատրիարք արքեպիսկոպոս Սահակ Մաշալյանը։

Պատրիարքն այս հայտարարությունն արել է 2025 թվականի հունվարի 6-ին՝ Ստամբուլում հայկական համայնքային կազմակերպությունների ներկայացուցիչների հետ հանդիպման ընթացքում։ Անդրադառնալով իր վերջին այցին Անկարա՝ պատրիարքը նշել է, որ Իսկենդերունի վնասված եկեղեցին ընդգրկվել է նախարարության աջակցման ծրագրում, ինչը հույս է ներշնչում, որ վերականգնման աշխատանքները կմեկնարկեն մոտ ապագայում։

Եկեղեցին գտնվում է ներկայիս Թուրքիայի տարածքի Հաթայի մարզի Ալեքսանդրեթ (այժմ՝ Իսկենդերուն) քաղաքում։

Սրբոց Քառասնից Մանկանց եկեղեցին կառուցվել է 1872 թվականին։ Վերջին անգամ այս եկեղեցում պատարագ էր մատուցվել 2002 թվականին։