«ԱՄՆ-ն դաշնակիցներից հետախուզական տվյալներ է խնդրել` Իրանում թիրախների վերաբերյալ»․ #WP

ԱՄՆ-ի նախագահ Դոնալդ Թրամփի վարչակազմը եվրոպացի դաշնակիցներին խնդրել է կիսվել հետախուզական տվյալներով Իրանում հնարավոր թիրախների վերաբերյալ՝ դրանց ուղղությամբ հարվածներ հասցնելու համար։ Հարցումը ուղարկվել է հունվարի 13-ին, հայտնում է The Washington Post-ը՝ հղում կատարելով երկու եվրոպացի պաշտոնյաների։

«Մենք չունենք որևէ ապացույց, որ նախագահ Թրամփը պատրաստվում է հարվածել միջուկային օբյեկտներին։ Ավելի հավանական է, որ նա կթիրախավորի այն կազմակերպությունների և ուժերի ղեկավարությանը, որոնք պատասխանատու են ցուցարարների սպանությունների համար կամ առնչություն ունեն դրանց հետ»,- նշել է պաշտոնյաներից մեկը։

WP-ի աղբյուրի խոսքով՝ Փենթագոնը մտահոգված է Իրանի կողմից հնարավոր պատասխան քայլերով։ Վենեսուելայում առաքելության պատճառով Մերձավոր Արևելքում ԱՄՆ կենտրոնական հրամանատարությունից դուրս են բերվել ինքնաթիռներ, նավեր և հատուկ նշանակության ուժեր: «Վարչակազմը պարզապես այս պահին տարածաշրջանում չունի լիարժեք ռազմական հարված հասցնելու ռեսուրսներ», - նշել է աղբյուրը: