Սաուդյան Արաբիան, Կատարը և Օմանը վերջին պահին համոզել են Թրամփին` չհարձակվել Իրանի վրա

Սաուդյան Արաբիայի, Կատարի և Օմանի իշխանությունները համոզել են ԱՄՆ-ի նախագահ Դոնալդ Թրամփին չհարձակվել Իրանի վրա՝ վախենալով «տարածաշրջանային լուրջ հետևանքներից», հաղորդում է AFP-ն՝ հղում անելով Սաուդյան Արաբիայի բարձրաստիճան պաշտոնյայի։
Գործակալության աղբյուրի խոսքով՝ Սաուդյան Արաբիան, Կատարը և Օմանը վերջին պահին որոշել են «հուսահատ փորձ կատարել»՝ համոզելու Դոնալդ Թրամփին Իրանին՝ հնարավորություն տալ «ցուցադրել բարի մտադրություններ»։

«Մենք ԱՄՆ-ին ասել ենք, որ Իրանի վրա հարձակումը կհանգեցնի տարածաշրջանում լուրջ պատասխան հարվածների շարքի», - AFP-ն մեջբերում է անանուն պաշտոնյայի խոսքերը։ Պաշտոնյայի խոսքով՝ այս հարցի շուրջ երկխոսությունը դեռևս շարունակվում է՝ արդյունքը ամրապնդելու համար։

Հունվարի 13-ին The Wall Street Journal-ի աղբյուրները հայտնել են, որ Սաուդյան Արաբիան, Օմանը և Կատարը նաև նախազգուշացրել են նավթի շուկաներում խռովությունների մասին Իրանի վրա հարձակման դեպքում, ինչը, ի վերջո, կվնասի ԱՄՆ-ի տնտեսությանը։

Իրանում բողոքի ցույցերի սկսվելուց կարճ ժամանակ անց Սպիտակ տունը, ըստ լուրերի, քննարկում էր միջամտության մի քանի տարբերակ։ Սակայն մեկ օր առաջ Դոնալդ Թրամփը հայտարարել է, որ «մյուս կողմից շատ կարևոր աղբյուրների» համաձայն, Իրանի իշխանությունները դադարեցրել են ցուցարարների սպանությունները: NBC-ի տվյալներով՝ ԱՄՆ-ի նախագահը ցանկանում էր «արագ և վճռական» հարված հասցնել Իրանին, սակայն նրա խորհրդականները չէին կարող երաշխավորել, որ դա կհանգեցնի երկրում իշխանափոխության: Վարչակազմը նաև մտահոգված էր նման հարձակմանն Իրանի հնարավոր արձագանքով, հաղորդել է հեռուստաալիքը: