«Եվրոպական երկրները սիրում են խոսել ապագայի մասին, բայց խուսափում են կոնկրետ գործողություններից»․ Զելենսկի

Եվրոպական երկրները սիրում են խոսել ապագայի մասին, բայց խուսափում են կոնկրետ գործողություններից, հայտարարել է Ուկրաինայի նախագահ Վլադիմիր Զելենսկին՝ Դավոսի ֆորումում՝ ԱՄՆ նախագահ Դոնալդ Թրամփի հետ հանդիպումից հետո ելույթի ժամանակ։

«Անցյալ տարի, այստեղ՝ Դավոսում, ես իմ ելույթն ավարտեցի հետևյալ խոսքերով. «Եվրոպան պետք է իմանա, թե ինչպես պաշտպանվել»։ Անցել է մեկ տարի, և ոչինչ չի փոխվել»,- ասել է նա։ Զելենսկու խոսքով՝ ԱՄՆ նախագահ Դոնալդ Թրամփը Ռուսաստանի դեմ ավելի խիստ պատժամիջոցներ է կիրառում, որոնք Եվրոպան չի կարող կիրառել։ Նա հավելել է, որ Ռուսաստանին հաջողվել է կանխել Եվրոպայի կողմից սառեցված ակտիվների օգտագործումն Ուկրաինային օգնելու համար։

Նա նշել է, որ Եվրոպան հույսը դնում է ՆԱՏՕ-ի արդյունավետության հանդեպ հավատի վրա։ Նրա խոսքով, սակայն, «ոչ ոք երբեք չի տեսել», թե ինչպես է դաշինքը գործում անդամ պետության վրա հարձակման դեպքում։