ԱՄՆ-ն կոչ է արել իր քաղաքացիներին անհապաղ լքել Իրանը

ԱՄՆ-ն կոչ է արել իր քաղաքացիներին անհապաղ լքել Իրանը՝ անվտանգության իրավիճակի սրման և տեղաշարժի ու կապի լայնածավալ սահմանափակումների պատճառով։ Իրանում ԱՄՆ (վիրտուալ) դեսպանատան հայտարարության համաձայն՝ քաղաքացիները միայն ԱՄՆ անձնագիր ունենալու պատճառով կարող են ձերբակալվել։ Դեսպանատունը նաև զգուշացրել է ինտերնետի հնարավոր խափանումների և չվերթների չեղարկումների մասին։

«Եթե չեք կարողանում հեռանալ, փնտրեք անվտանգ տեղ ձեր տանը կամ անվտանգ շենքում։ Պահեք սնունդ, ջուր, դեղորայք և այլ անհրաժեշտ իրեր»,- ասվում է հայտարարության մեջ։ ԱՄՆ իշխանությունները որպես հնարավոր ելքի ուղիներ նշել են Հայաստանով կամ Թուրքիայով անցնող ցամաքային երթուղիները։

ԱՄՆ-ն և Իրանը այսօր Օմանում բանակցություններ կանցկացնեն՝ Թեհրանի միջուկային ծրագրի շուրջ։ Իրանական պատվիրակությունը կգլխավորի արտաքին գործերի նախարար Աբբաս Արաղչին, իսկ ամերիկյան պատվիրակությունը՝ ԱՄՆ նախագահի հատուկ բանագնաց Սթիվ Ուիթքոֆը։