«Ռուսաստանը պատրաստ է ԱՄՆ-ի հետ քննարկել անվտանգության հարցեր». Լավրով

Ռուսաստանը պատրաստ է քննարկել անվտանգության հարցեր Միացյալ Նահանգների հետ՝ ռազմավարական կայունության շուրջ երկխոսության շրջանակներում, հայտարարել է Ռուսաստանի արտաքին գործերի նախարար Սերգեյ Լավրովը։

«Մենք չենք ցանկանում, որ ՆԱՏՕ-ն ներգրավված լինի ամբողջ Եվրասիական մայրցամաքի անվտանգության մեջ։ ... Մենք՝ Չինաստանի Ժողովրդական Հանրապետության և Շանհայի համագործակցության կազմակերպության ու BRICS-ի մյուս անդամների հետ միասին, պաշտպանում ենք անբաժանելի անվտանգության սկզբունքը։ Մենք, իհարկե, պատրաստ կլինենք քննարկել այս հարցը մեր ամերիկացի գործընկերների հետ, երբ պարզ դառնա նրանց ընդհանուր դիրքորոշումը ռազմավարական կայունություն կոչվող հիմնական ասպեկտների վերաբերյալ», - ասել է Լավրովը Շվեյցարիայի արտաքին գործերի նախարար Իգնացիո Կասիսի և ԵԱՀԿ գլխավոր քարտուղար Ֆերիդուն Սինիրլիօղլուի հետ բանակցություններից հետո տեղի ունեցած մամուլի ասուլիսում։