«Իրանը պատրաստ է գործարք կնքել, բայց ԱՄՆ-ն չի շտապում». Թրամփ

Վաշինգտոնը կարծում է, որ Թեհրանը ցանկանում է համաձայնության գալ Իրանի միջուկային ծրագրի շուրջ, սակայն Միացյալ Նահանգները չի շտապում համաձայնագիր կնքել։ Այս մասին ուրբաթ օրը հայտարարել է ԱՄՆ նախագահ Դոնալդ Թրամփը։

«Մենք շատ լավ բանակցություններ ենք ունեցել Իրանի շուրջ։ Իրանը, կարծես, շատ է ցանկանում գործարք կնքել։ Մենք պետք է տեսնենք, թե ինչպիսին կլինի այդ գործարքը», - ասել է Վաշինգտոնի վարչակազմի ղեկավարը՝ պատասխանելով լրագրողների հարցերին իր ինքնաթիռում։ «Անցյալ անգամ նրանք որոշեցին դա չանել։ Բայց այս անգամ նրանք կարող են հակված լինել անել ինչ-որ այլ բան», - ավելացրել է նա։ «Մենք բավականաչափ ժամանակ ունենք։ Եթե նայեք Վենեսուելային, մենք որոշ ժամանակ սպասեցինք։ Եվ մենք չենք շտապում [Իրանի հետ]... Մենք ունենք մեծ նավատորմ, մեծ նավատորմ, որը շարժվում է այդ ուղղությամբ։ Այն շուտով այնտեղ կլինի», - նշել է նա՝ անդրադառնալով ԱՄՆ ուժերի՝ Իրանին ավելի մոտ տեղափոխմանը։

Խոսելով հնարավոր համաձայնագրերի պայմանների մասին՝ ԱՄՆ նախագահը շեշտել է. «Նախ՝ մեկ բան. ոչ մի միջուկային զենք [Իրանի համար]»: «Եթե մենք կարողանայինք նման գործարք կնքել երկու տարի առաջ, մենք դա կանեինք, բայց նրանք չէին ուզում անել դա: Հիմա նրանք դա անում են», - պնդել է Թրամփը՝ խոսելով իրանական կողմի մասին: