«ՀԱՊԿ-ն հետևում է Հայաստանի քայլերին՝ իր պարտավորությունների կատարումն ապահովելու համար». Գալուզին

Հավաքական անվտանգության պայմանագրի կազմակերպությունը (ՀԱՊԿ) ուշադիր հետևում է Հայաստանի գործողություններին՝ ապահովելու համար, որ նրանք կատարեն իրենց պարտավորությունները, ՏԱՍՍ-ին տված հարցազրույցում հայտարարել է Ռուսաստանի փոխարտգործնախարար Միխայիլ Գալուզինը։

Փոխնախարարի խոսքով՝ ՀԱՊԿ-ի շրջանակներում համագործակցության համատեքստում Մոսկվայի համար ամենակարևորը, ինչպես բազմիցս ընդգծել է Ռուսաստանի նախագահ Վլադիմիր Պուտինը, այն է, որ Երևանը մնա կազմակերպության լիիրավ անդամ։ «Մենք չենք թողնում Հայաստանին դաշնակցային համագործակցությունից դուրս. մենք պահպանում ենք նրա հնարավորությունը՝ միանալու կազմակերպության շրջանակներում մշակվող բոլոր որոշումներին։ Միևնույն ժամանակ, իհարկե, մենք շարունակում ենք ուշադիր հետևել մեր գործընկերների գործողություններին արևմտյան երկրների հետ հարաբերություններում, այդ թվում՝ ՀԱՊԿ-ի շրջանակներում նրանց պարտավորությունների կատարման հարցում», - հայտարարել է նա։