«Պուտինն արդեն սկսել է Երրորդ համաշխարհային պատերազմը»․ Զելենսկի

Ուկրաինայի նախագահ Վլադիմիր Զելենսկին կարծում է, որ ՌԴ նախագահ Վլադիմիր Պուտինն արդեն սկսել է Երրորդ համաշխարհային պատերազմը։ Եվ հիմա խնդիրն է՝ թույլ չտալ, որ այն լայնամասշտաբ դառնա, ինչն էլ անում է Ուկրաինան։ Այս մասին Զելենսկին ասել է BBC-ին տված հարցազրույցում։

Զրույցի ընթացքում հաղորդավարը նշել է, որ ԱՄՆ նախկին նախագահ Ջո Բայդենը իր նախագահության տարիներին մտահոգված էր Պուտինի միջուկային սպառնալիքներով և Երրորդ համաշխարհային պատերազմի ռիսկով։ Հարցին, թե արդյոք ներկայիս նախագահ Դոնալդ Թրամփը կիսում է այս տեսակետը, Զելենսկին պատասխանել է. «Մենք տարբեր տեսակետներ ունենք Երրորդ համաշխարհային պատերազմի վերաբերյալ։ Ես կարծում եմ, որ Պուտինն այն արդեն սկսել է։ Միակ հարցն այն է, թե որքան տարածքներ կարող է նա գրավել և ինչպես կանգնեցնել նրան»,- ասել է նա։

Զելենսկին նշել է, որ այս հարցը հրատապ է ոչ միայն այն պատճառով, որ Ռուսաստանը չպետք է հաղթի, այլև այն պատճառով, որ Ռուսաստանը ցանկանում է աշխարհին պարտադրել կյանքի այլ ձև և փոխել այն կյանքը, որը մարդիկ ընտրել են իրենց համար։