«Եթե գործարք չկնքենք, Իրանի համար շատ վատ կլինի»․ Թրամփ

ԱՄՆ նախագահ Դոնալդ Թրամփը կարծում է, որ լրատվամիջոցները միտումնավոր սխալ են գրում Իրանի հետ հնարավոր պատերազմի մասին. ինքն անձամբ կնախընտրեր գործարք կնքել:

«Այն ամենը, ինչ գրվել է Իրանի հետ հնարավոր պատերազմի մասին, սխալ է գրված, և դա միտումնավոր է արված։ Որոշումը կայացնում եմ ես, ես կնախընտրեի գործարք կնքել, քան չկնքել, բայց եթե մենք գործարք չկնքենք, դա շատ վատ օր կլինի այդ երկրի և, ցավոք, նրա ժողովրդի համար»,- գրել է Թրամփը՝ Truth Social-ում։

Նա նաև նշել է, որ լրատվամիջոցների պնդումները, թե Միացյալ շտաբների պետերի կոմիտեի նախագահ, գեներալ Դեն Քեյնը չի աջակցում Իրանի դեմ արշավին, նույնպես սխալ են։ «Գեներալ Քեյնը, ինչպես և մենք բոլորս, չէր ցանկանա պատերազմ տեսնել, բայց եթե որոշում ընդունվի Իրանի դեմ ռազմական դիմակայության մասին, նա կարծում է, որ հաղթելը հեշտ կլինի»,- նշել է Թրամփը։

Axios-ը, հղում կատարելով աղբյուրներին, հաղորդել էր, որ Քեյնը զգուշացրել է Թրամփին և բարձրաստիճան պաշտոնյաներին, որ Իրանի դեմ ռազմական արշավը կարող է զգալի ռիսկեր պարունակել, այդ թվում՝ ձգձգվող հակամարտության մեջ ներքաշվելու հնարավորություն։