«Իրանի շուրջ ճգնաժամը կարող է տևել ամիսներ». բրիտանացի փոխնախարար

Մեծ Բրիտանիայի Արտաքին գործերի նախարարության Մերձավոր Արևելքի և Հյուսիսային Աֆրիկայի հարցերով փոխնախարար Համիշ Ֆալկոները կարծում է, որ Իրանի շուրջ ճգնաժամը կարող է տևել շաբաթներ կամ նույնիսկ ամիսներ։
«Իրավիճակը զարգանում է, բայց կան նշաններ, որ այս ճգնաժամը կտևի ոչ միայն օրեր, այլև շաբաթներ, և հնարավոր է՝ ամիսներ։ Մենք կենտրոնացած չենք միայն մոտ ապագայի վրա»,- ասել է Ֆալկոները Մեծ Բրիտանիայի խորհրդարանում։ Նա նշել է, որ երեկ երեկոյան բրիտանական կործանիչները մասնակցել են Կատարի և տարածաշրջանի այլ երկրների պաշտպանության գործողություններին։ Հինգշաբթի օրը, հավելել է նա, տարածաշրջանում գտնվող բրիտանական ուժերը կստանան հակաօդային պաշտպանության հրթիռների ևս մեկ խմբաքանակ։