«ՌԴ-ի օգնությունից ՀՀ-ի հրաժարվելը հասկանալի կլիներ, եթե դրա կարիքն այլևս չլիներ»․ Զախարովա

Երևանը մերժել է Ռուսաստանի նախաձեռնությունը՝ մարդասիրական օգնություն ցուցաբերելու Ղարաբաղից տեղահանված անձանց։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Նա նշել է, որ Մոսկվան առաջիններից մեկն էր, որը մարդասիրական օգնություն է ուղարկել Հայաստան, և հավելել է, որ «չգիտես ինչու արդեն այն ժամանակ Երևանում այնքան էլ ուրախ չէին ռուսական կողմի աջակցության համար»: Զախարովայի խոսքով՝ որոշ ապրանքներ և սննդամթերքի փաթեթներ գնվել են անմիջապես Հայաստանից, ինչը, ըստ նրա, լրացուցիչ խթան է հանդիսացել տեղական արտադրության և փոքր բիզնեսի համար։

«Երևանի հրաժարումը հետագա օգնությունից հասկանալի կլիներ, եթե օգնության կարիք այլևս չլիներ... Եկեք նայենք փաստերին. Հայաստանի քաղաքացիների կողմից նման օգնության դիմումների թիվը միայն աճել է»,- նշել Է Զախարովան։ Ընդ որում, հայկական կողմը որպես հաջորդ խմբաքանակի մատակարարումը չհամաձայնեցնելու հիմք մեջբերել է նախընտրական շրջանում նվիրատվությունների և բարեգործական օգնության տրամադրումը սահմանափակող իրավական նորմերը։ «Չեմ թաքցնի, մենք փորձեցինք պարզաբանել, թե կոնկրետ ինչ էր նկատի առնվում, բայց, ցավոք, հայ պաշտոնյաները դժվարացան բացատրել, թե կոնկրետ ինչի մասին է խոսքը»,- եզրափակել է Զախարովան։